Kumin chhungin Aizawl district-ah Thubuai 1,039 ziah luh a ni tawh

Nimin khan Aizawl leh Lungleiah crime review meeting neih a ni. Aizawlah chuan meeting hi SP conference hall-ah Aizawl SP Brijendra Kumar hoa neih a ni a, kuminah November thla thlengin Aizawl district-ah thubuai 1,039 ziah luh a nih tawh thu tarlan a ni.

Meeting-ah hian kumin Krismas leh kum tharte mipuite'n rálmuang tak leh hlim taka an hman theih nana hmalak mek dan leh hmalak zel dan tur an sawiho a; "Nasa zawka misual hnu chhui kawngah hmalak ni se, hunpui lo thleng turah thianghlim leh rálmuang taka hun kan hman theih nan sorkar khap thil - hâlpuah leh a kaihhnawih te, zu leh ruih theih thilte hmanga mi dangte tana harsatna siam lo tura hmalak zel ni se. Heng thil dap tur leh ti lo tura inzirtirte nasa taka kalpui zel ni se," an ti.

Meeting-a tarlan danin, kuminah November thla thlengin Aizawl district-ah thubuai 1,039 ziah luh a ni tawh a, thubuai 678 chinfel tawh niin, thubuai 364 chu chinfel a la ni lo. Thubuai ziah luh zinga 781 chu IPC case niin, thubuai 158 chu non-IPC case a ni a, thubuai 100 chu special report case a ni thung.

Thubuai ziah luh zingah rûkrûk leh inrawk a tam ber a, thubuai 554 ziah luh a ni a; POCSO thubuai 63 ziah luh niin, MLPC Act hnuaiah thubuai 57 ziah luh a ni. Thubuai thubuai paruk a awm bawk.

Lungleiah chuan crime review meeting hi SP conference hall-ah Lunglei SP C Lalthanmawia hoa neih a ni a; Lunglei district-ah kumin December 19 thleng khan thubuai 255 ziah luh a ni tawh tih an tarlang. Thubuai 255 zinga 206 chu chinfel a ni tawh a, thubuai pali chu final report thehluh tawh niin, thubuai la chinfel loh 45 a awm.