Khawlai chei lawmman a ṭhahnem Khawlai cheitu veng an tlem thung

Tourism department chuan Central YMA nen ṭang dunin kumin Krismas leh kum thar vuakveta Aizawl khawpui kâwn leh khawlai kawngpui dung chei nual zualte hnenah lawmman sum ṭhahnem tak hlan an tum. Chutih laiin, kuminah hian kum dang aiin kâwn leh khawlai chei an uar lo deuh nia hriat a ni.

Tourism department hian khawlai leh kâwn chei mawi zual veng thlan chhuahte hnena lawmman an pek turah hian, pakhatna hnenah Rs. 4,00,000, pahnihna hnenah Rs. 3,00,000 leh pathumna hnenah Rs. 2,00,000 an pe dawn a; veng chei zawng zawng hnenah participation prize pek an tum bawk. Veng cheite chu Krismas leh kum thar inkarah endik a ni ang.

Veng chei lawmman dawng thei turte chu December 15, 2018 ral hmaa inhriattir tura tih an ni. Hetih lai hian, kuminah kum dang aiin kâwn leh khawlai cheitu veng (YMA/local council) an tlem a, a chei chhunte pawhin kum dang aiin an chei uar lo deuh nia hriat a ni.

Kum dang aia khawlai chei nasat loh chungchangah hian chanchinbumi ṭhenkhatte chuan, kumin hi Mizoram inthlanpui kum a ni a, inthlan boruakin mipui a chiah rei a, Krismas boruakah mipui an awm har vang nia an ngaih thu an sawi hlawm.