Zirtirtu sem rual kan tum - Lalchhandama

School Education minister Lalchhandama Ralte chuan nimin khan a pisaah MZP hruaitute a kawm a, Mizorama zirna siamṭhat dan tur an sawiho a; Minister chuan, Mizoram hmun hrang hranga zirtirtu indaih lohna chu sorkarin a hriat thu leh a theih chen chenah zirtirtu sem rual an tum thu a sawi.

Meeting-ah hian zirna siamṭhatna atan - zirtirtu sem rual, Mizoram Education Service siam, School Education chu directorate pahnih Elementary leh Secondary-a ṭhen, CCE ennawna siamṭhat, national leh state level-a zirtirtu chawimawina dawngte hamṭhatna pek, sikul kai hun, hostel rules leh school fee chung­changte an sawiho a ni.

School Education Minister chuan, Mizoram hmun hrang hranga zirtirtu indaih lohna sorkarin a hriat thu sawiin, "Kum thar, school session ṭan hmain zirtirtu sem rual hi a theih chen chen tih kan tum dawn a, MZP nen pawh kan ṭanho a ṭul dawn a ni," a ti a; Mizoram Education Service siam a vei ṭhin thu sawiin, "Mizoram Education Service siam a nih theih nan theihtawp ka chhuah dawn a, kan siam ngei theih ka ring," a ti.

Lalchhandama Ralte chuan, School Education chu directorate pahnih - Elementary leh Secondary-a ṭhen hran chu School Education siamṭhat nan a pawimawh dawn hle nia sawiin, "Harsa deuh pawh ni se, kan ṭan tlan chuan kan ti thei ang. Ṭhen a nih theih nan theihtawp kan chhuahho dawn a nia," a ti a; MZP thu thlen dangte pawh a lo en zui tur thu a sawi.

School Education Minister hi MLA pa­hnih C Lalmuanpuia leh Lalrinsanga Ralte leh, School Education secretary Esther Lalruatkimi ten an ṭawiawm a ni.