National Mathematics Day hman a ni

Mizoram Science, Technology & Innovation (MISTIC), DST leh Mizoram Mathematics Society-te buatsaihin nimin khan Mizoram Science Centre, Beraw­tlangah National Mathematics Day hman a ni a, MLA L Thangmawia leh Planning secretary Dr C Vanlalramsanga ten an hmanpui.

National Mathematics Day lawmna hi chief scientific officer Dr RK Lallianthanga'n a kai­hruai a; khuallian L Thangmawia chuan, Mathematics Competition 2018-a ti ṭha naupangte chu theih­tawpa lehkha zir tur leh huaisen taka mathematics zir zel turin a fuih a, "Mathematics hi Mizote hian kan ngam lehzual a ngai a, kan chawhmeh bai ang mai hian chawh reng a ngai a ni," a ti.

Khualzahawm Dr C Vanlalramsanga chuan, Mathematics zirna chu tun aia nasa lehzuala naupan lai aṭanga a bul ṭhut inzirtir a pawimawh thu a sawi a, chutiang tur chuan mathematics thiamte chu ṭan la turin a chah.

Day hmannaah hian Day puala 10th. State Level Mathematics Competition lawmman sem a ni a, Mizo nula tlangval mathematics-a Ph.D. hmute an chawimawi bawk. Mizorama science lam buaipuitu society hrang hrang te, zirlai leh an nu leh pate leh a buaipuitu department hotute an tel a ni.

National Mathematics Day hi India rama mathematics lama sûlsutu Dr S Ramanujama hriat reng nan a pian champha December 22-ah hman ṭhin a ni a, kuminah chuan Inrinni a nih avangin nimin khan hman a ni.