Huapzo sorkar kan din dawn - TJ Lalnuntluanga

Champhai South bial aṭanga MLA atana thlan tlin TJ Lalnuntluanga chu nimin khan Champhai South MNF Block bultumin Champhai Circuit House-ah hmuah a ni a, TJ Lalnuntluanga chuan MNF sorkar chu huapzo sorkar a nih tur thu a sawi.

Minister of state TJ Lalnuntluanga chuan mipuite ram leh hnam tana thawhpui atana sawmin, "Tute mah inkiltawih loh tur a ni. Dik lo leh fel lo taka thil ti turin sorkar officer leh midangte aṭang­-in campaign na tur sum leh pai engmah ka lak loh avangin ram leh hnam tan huaisen takin ke ka pen ang ang," a ti a, danin a phal loh thil ti tura nawr lo turin mipuite a chah.

Champhai khawtlang hmasawnna tur kawng hrang hrang ngaihtuah a nih tur thu sawiin TJ Lalnuntluanga chuan, "Inkalpawhna kawng ṭha zawk leh mipuiten nitina kan mamawh eirawngbawlna gas hnianghnar zawka hmuh a nih theihna atan hmalak ka tum a ni," a ti.

TJ Lalnuntluanga chuan Chief Minister kaihhruaina hnuaiah ram rorelna ṭha zawk nei turin hmalak mek a nih thu sawiin, "Zoramthar politics kalpui a ni dawn a, a dawng tur dik takte hnen thleng phak hmasawnna, rethei leh pa­chhiate ngaihsaktu sawrkar din a ni," a ti a, sorkar hnathawkte chu dik leh rinawm taka an hna thawk tur leh hlemhletna te chu um bo ngam zel turin a chah.