MIZOFED-in dragon fruit thawn chhuak

MIZOFED Ltd. chuan Mizorama thar dragon fruit-te chu Delhi lamah an thawn chhuak ṭan a, nimina thawn chhuah ṭanna hun hi Cooperation minister C Lalrinsanga'n a hmanpui.

C Lalrinsanga chuan, Covid-19 léng vanga harsatna hrang hrangin Mizoram a tlâkbuak chunga dragon fruit sample thawn chhuah theih a ni ta chuan a hralhna kawng zau zawk a hawn dawn thu a sawi a, "Hma kan sawn zel chuan kan economic perspective pawh subsistence level chauh ni loin, market economy lam kawng kan zawh chho thei dawn tihna a ni," a ti.

Cooperation Minister chuan, SEDP-in a tum zing­ah market thleng phak ruahmanna kalpui a tel tih sawiin, "Mizote hian ṭan rual hi kan thiam zawng tak a ni a, cooperative movement hi kan zei sa a ni bawk a, tuna kan mamawh chu hma lam pana kal a ni," a ti a; ṭang ruala thapui an thawh phawt chuan Pathian malsawmna an hmuh zel tur thu a sawi.

Sorkar thuchhuah tarlan danin, Mizoram hi dragon fruit thar chhuah­ah India rama hmahruai­tu a ni mek a; nimina an thawn chhuahte chu Thingsul Tlangnuama lo neitute thar a ni. MIZO­FED hian Crofarm, Gurgaon, Delhi hnenah an thawn a, hunbi mumal tak neia thawn chhuah chhunzawm an tum a ni.