2018 Thlirletna

Olympic champion Jeremy Lalrinnunga
Jeremy Lalrinnunga chuan October 6-18 chhunga neih Youth Olympic Games 2018-ah gold medal a chawi chhuak. Weightlifter Jeremy hian 62 kg category-ah 274kg chawiin pakhatna a ni a, Mizo rawlthar duhawm hi India infiammi zingah Youth Olympic-a pakhatna ni thei hmasa ber a ni.
Argentina khawpui Buenos Aires-ah inelna hi neih a ni a, snatch chawi hmasak niin Govt. Complex naupang Jeremy hian 124kg chawiin hma a hruai nghal. Chutihrualin a dinhmun hi a la him nghal mai bik lo, Turkey rawlthar Toptas Caner nen an inthlauhna chu 2kg chauh a ni.
Hun rei vak lo chawlh an neih hnuah clean & jerk chawi zui niin, Mizo rawlthar hian 150kg a chawi leh nawlh! A elpui Caner-a'n 141kg chauh a chawi avangin a total chu 263kg a ni a, Jeremy hian fal takin hnehna a chang; pathumna chu Colombia aiawh a inlan Villar Manjarres Estiven Jose niin a pumpuiah 260 a chawi ve bawk.

Mizo tleirawl Siami tan Silver
Summer Youth Olympic Games 2018, October 6-18 chhunga neih takah khan Lalremsiami Hmar telna India nula hockey khel thiam ten final lut mah se a thlengtu Argentina 3-1 in an hneh lo a, Mizo tleirawl Siami ten silver medal an hlawhchhuak.
Buenos Aires, Argentina-ah India tleirawl hockey khel thiam ten gold medal pahnih an beisei a, hmeichhe team an chak zawh loh bakah mipa team pawh Malaysia lakah 4-2 in an chak lo a, hockey team hian duhthusamin a hmawr bawk thei lo mah se silver medal pahnih an vaw chhuak ta tho a ni.
India vice captain Siami hi Mizo zingah Youth Olympic hockey huanga silver medal la thei hmasa ber a ni a, August thla khan Mizo infiammi zinga a hmasa ber ni tur bawkin Asian Games 2018-ah silver bawk a la tawh.

BCCI-ah Mizoram cricket
Cricket Association of Mizoram chu hun rei tak hnuah India rama cricket thuneitu sang ber Board of Control for Cricket in India hnuaiah an inziak lut a, BCCI hnuaia inelna Vijay Hazare Trophy leh Ranji Trophy an khel. Hazare-ah hian Plate Group-ah awmin an group-ah a hniam ber dawttu an ni a, Ranji-ah pawh group ngai thoah awmin match ngaah chak an nei lo a, table mawngphah luahin knockout stage an khel lo chiang hle.

MSL champion Zarkawt BCA
Mizoram chhung basketball inelna lian leh ngaihhlut ber Mizoram Super League chu December 14 zan khan Hawla Indoor Stadium, Republic Vengthlangah khelh zawh a ni a, champion lai Zarkawt BCA chuan Tuikual South lakah 2-1 in series an la a, a vawi hnih nan an champion.
MSL-ah hian a tir lam season pahnihah Khatla TBL an champion a, chumi hnuah Mission Veng Vikings champion ve lehin a hnuhnung pahnihah erawh chuan Zarkawt BCA elphak an awm lo a ni.

MPL7 champion Aizawl FC
I League club Aizawl FC chuan MPL vawi thum champion hmasa ber ni turin Mizoram Premier League Season 7-ah champion lai leh league hmahruaitu Chhinga Veng chu hun pangngaiah 1-1 a an inhnehtawk pui hnuin penalty shootout-ah 5-4 in
an chak.