Krismas & kumthar lâwm lo turin Sorkarin kohhrante ngen a tum
Nimin khan SAD Conference Hall-ah Health minister Dr R Lalthangliana leh Home minister Lalchamliana te hoin Covid-19 chungchang leh Krismas lo thleng tura Mizoram inbuatsaih dan tur sawiho a ni a; Krismas hunpuiah kohhrante chu inkhawm, zaikhawm leh ruaiṭheh huaihawt lo tura ngen an rél.
Sorkar thuchhuah tarlan danin, Krismas leh kumthar lo thleng tur chungchang te, hunpui lawm ṭhin dante leh Mizorama Covid-19 léng mek dinhmun sawiho a ni. Covid-19 chu thlasikah a thawk na zuala a lan avangin, nasa lehzuala fimkhur a ṭulin an hria a, mipui himna atan kohhrante chu inkhawm, zaikhawm leh ruaiṭheh bakah, mipui punkhawm theihna tur huaihawt lo tura ngen ni se, an ti a ni.
Dawrkaite inhawn dan tur sawiho a ni a, ei leh bàr zawnna kawnga harsatna lian zawk a thlen loh nan ruahmanna mumal taka siam ṭul an ti a; hunpui thleng turah tih tur leh tih loh tur nia ṭhate rawtna chi hrang hrang sawiho a ni. Hemi chungchanga kaihhruaina duan chu Chief Secretary kaihhruai State Disaster Management Authority hnuaia State Executive Committee kutah an dah.
Aizawl khawpui hmun hrang hrangah awlsam zawka swab test theihna tur mobile testing centre 'kiosk' siam chungchanga hma latu Medical Operational Team chuan R Dengṭhuama Hall, Mualpui leh Bawngkawn South community hall an rawt a; hman theih tura buaipui mek a ni. Aizawl chhim lamah hmun laili pakhat chhinchhiah a ni tawh bawk.
Kiosk-a RT-PCR, TrueNAT leh RAT hmanga swab sample endikna man chu India ram khawpui hrang hranga rate nen khaikhina mipui tana phurrit lutuk lo tura siam ni se, an ti.
Covid-19 vei zingah SRH-ZMC leh CCC-a awm lo a, mahni sènsoa hmun danga awm duh tan ruahmanna siam ṭha an ti a; Covid-19 No Tolerance Drive kalpui mek chu khauh lehzuala kalpui ṭha an ti bawk.
Ṭhutkhawma tarlan danin, Mizoramah DCH/DCHC/CCC 62 a awm a, chu'ngah chuan khum 2,573 leh ICU-ah khum 42 a awm. Report hnuhnung berah, khum 2,118 leh ICU khum 41 a ruak a ni.
Meeting-ah hian minister Lalruatkima, Covid-19 Medical Operational Team chairman Dr ZR Thiamsanga, MLA leh Chief Secretary bakah, Health leh Home department hotu te, Mizoram Kohhran Hruaitute Committee, NGO Coordination Committee leh Indian Medical Association aiawhte an tel.