NHM-a thawkte'n badge dum bel titàwp
National Health Mission Contractual Association Mizoram (NCAM) chuan thuchhuah siamin, Health Minister ngenna angin kumin April aṭanga June thla hlawh an lâk theih nan July 7, Thawhlehni khan NHM account-ah cheng nuai 1229 a lut niin an tarlang a; sorkar aṭanga thu lawmawm an dawn avangin badge dum an bel chu nimin khan an titàwp.
NCAM chuan, Finance department-in NHM pawisa token a pek sa cheng nuai 1,331 chu pek chhuah a remti a, July 7 khan nuai 1,229 chu hlawh atana hman turin NHM account-ah thun a nih thu an sawi a, "Kan harsatnate min hrethiama ruahmanna min siamsaktu Finance deparment changtu CM Pu Zoramthanga hnenah leh Health minister Dr R Lalthangliana leh Finance department-te chungah kan lawm em em a ni," an ti.
Sorkar laipuia Ministry of Health & Family Welfare (MoHFW)-in Record of Proceeding (RoP) 2020-21 (FY) approval a pek anga hlawh leh hlawh punna pek Mizoram sorkarin a remtih thu, NCAM chuan an tarlang bawk. NCAM phût dang, Health department-a regular post ruak a awmin, NHM hnuaia thawkte MoHFW duh dan anga a ngheta luh theih dan tur ruahmanna siamsak tura an ngenna chu Health Minister-in remchang hmasaa ngaihtuahsak a tiam niin an tarlang a; chuvang chuan, lungawi lohna lantir nana badge dum an bel chu nimin khan an titawp tih an puang.
NCAM chuan, hun lo kal zel turah a hun taka hlawh an lâk zel theih nan leh MoHFW aṭangin fund mumal taka an dawn zel theih nan Mizoram Treasury-a NHM sum la awmte chu a rang thei ang bera pe chhuak turin Finance changtu Chief Minister leh Finance department hotute an ngen nghal a ni.