Bairabi-a bamboo kudama kuhva rah Police-in an bawhzui turah an ngai lo ; Customs hnenah thil awm dan an hrilh

Bairabi North-a bamboo industry kudam pakhata kuhva rah dah chungchang chu Mizoram police-te chuan an danah an kut a nih loh avangin an bawhzui turah an ngai lo a, chuvang chuan Aizawla Customs hotute hnenah thil awm dan an hriattir.

Police hotute hnen aṭanga thu dawn danin, kuhva rah chungchangah hian Bairabi SDC-in Bairabi Police Station officer-in-charge (OC) hnenah dan hnuaia a ṭul anga hma la turin a hriattir a, Bairabi PS chuan chhuitu tur police officer an ruat a ni. Chhui zui tura ruatin a chhui chian hnuah police bawhzui tura an ngaih loh avangin Aizawla Customs hotute an hriattir a ni.

Vanglaini palaiin police hotute aṭanga thu a dawn danin, kuhva rah chu police-te chuan checkgate-ah endikin an man thei a, an man hnuah Customs-ah an hlân tur a ni. Hetih lai hian, kudama awm kuhva rah chu dan angin an bawhzui theih a ni lo a, a bawhzui theitu chu Customs an ni.

Zampuimanga Group YMA chuan, February 23, 2022 khan bamboo industry kudamah Myanmar aṭanga dan loa lak luh kuhva ro dah khawm a awm thu an hria a, Bairabi SDC hnenah FIR thehlut mah se, SDC chuan Kolasib DC-te nen an inràwn hnuah an kut a nih loh thu Zampuimanga Group YMA hruaitute a hrilh. SDC chuan April 14, 2022 khan Barabi PS OC hnenah dan hnuaia a ṭul anga hma la turin a hriattir leh a ni.

Kuhva rah neitute chuan, Goods and Service Tax (GST) an pekna document (tax invoice) an nei a, mahse, GST document an neih chu kudama kuhva rah dah Zampuimanga Group YMA-in an hmuh hnua siam a ni.

Kuhva rah neitute chuan way bill pekna tax invoice pahnih an nei a, pakhat chu April 12, 2022 (Thawhlehni)-a pek chhuah a ni a, pakhat chu April 13, 2022 (Nilaini)-a pek chhuah a ni thung.

April 12, 2022-a pek chhuah tax invoice-a a lan danin, kuhva rah chu Lalhruaizela, Bairabi Hmarveng ta a ni a, Bose International, Kolkata-ah rél hmanga thawn tur a ni.

Way bill pekna tax invoice nia an sawia inziakah chuan, kuhva rah chu ip 580 niin, kg. 46,000 a ni a; kg. khat Rs. 250 anga chhûtin GST 5% pek a ni. Kuhva kg. 46,000 chu Rs 1,20,75,000 man a ni a, chuta ṭang chuan GST Rs 5,75,000 an pekna ni àwm tak invoice a awm a ni.