SEDP dawng turin MLA bial tinah mi 1,500 zel thlan phawt tum a ni - Dy. Chief Minister
SEDP Executive Board chairman Tawnluia, deputy chief minister chuan, MLA bial tinah SEDP dawng tur chhungkaw 1,500 zel thlan phawt tum a nih thu a sawi.
Nimina a bial chhunga Chalrang-New Chalrang Water Supply Scheme a hawnnaah thu sawiin Tawnluia chuan, "Kum 2022-23 financial year aṭangin sorkar flagship programme SEDP kaltlangin kut hnathawktute tan theihtawp chhuah tum a ni. A thawh khatna atan Rs. 50,000-a bul ṭan tum niin, chhungkaw 60,000 thlan chhuah hmasak tum a ni," a ti.
Dy. Chief Minister chuan, MLA bial tinah chhungkaw 1,500 zel thlan phawt tum a nih thu sawiin, "A thlangtu turte chu khua leh district level thlenga siam a ni dawn," a ti a, puih ngai leh puih tlak khai chhuah kawngah sorkarin theihtawp chhuah zel a tum thu a sawi.
A bial, Tuichang chhung chu Mizorama thei leh thlai hrang hrang thar tamna a nih thu sawiin Tawnluia chuan, "Ṭhalaite chu zirna bakah intodelh tuma theihtawp chhuaha hnathawh hreh lo turin ka chah a, an mamawh leh ṭul angte sorkarin a ngaihtuahsak zel dawn a ni," a ti.