ZPM-in CHA-a CT scan an enfiah April 2022 chhunga bun zo turin an phût

ZPM party hruaitute chuan an working president K Sapdanga hoin nimin khan Civil Hospital, Aizawl (CHA)-a CT scan khawl thar bun hna thawh dan a hmunah kalin an enfiah nawn leh a, an enfiah vawi thumna niin, April 2022 chhung ngeia bun fel turin sorkar an phût.

K Sapdanga chuan, thla ruk zet Civil Hospital Aizawl-ah CT Scan hman theih a ni tawh lo chu mi harsa leh rethei zawkte'n an tawrh nasat thu sawiin, "CT scan pawimawhzia hretu chu doctor-te mai bakah, a hmangtu damlo rethei tak takte kan ni a, ni tin zan tin emergency-a en ngai an awm reng a ni," a ti a; kumin April thla chhung ngeiin hman theiha bun ni se an duh thu a sawi.

Record-a a lan danin, CT scan hmangin thla khatah mi 300 vel en a ni ṭhin a, zan tin mi pahnih tal rîkrum (emergency)-a en ngai an awm bawk ṭhin tih sawiin Sapdanga chuan, "Khawl hman lai hi November 2021-ah a chhia a, chuti chung chuan October 2021-a khawl thar chah thlen chu tun thlengin hman lohin a la awm a ni," a ti.

K Sapdanga chuan, CHA-a CT scan dinhmun an en zui reng a, kumin March 22 leh 30-ah an party hruaitute'n an lo enfiah tawh thu sawiin, "Vawiin thlengin an la peih lo a, engtika hman theih tur nge tih pawh hriat a ni lo. ZPM chuan April thla chhung ngeiin sorkar hian bun fel se kan duh a, April thla chhung sorkar ngaihchàn kan tum," a ti a; April thla chhunga bun zawh a la nih loh chuan na zawka sorkar nawr an tum thu a sawi.

ZPM Working President chuan, mipui mamawh lian tak, nunna leh thihna hril thei, mi rethei zawkte'n an ban phak Civil Hospital-ah hun rei tak khawl pawimawh hman theih loha a awm chu pawi an tih thu sawiin, "Sorkarin a peih thei lo hi a mak kan ti a. Nikuma khawl thar lei, tun thlenga la hman theih loh hi technical problem aiin, ngaihsak loh vang a ang zawk. Sorkar hotute aṭangin tumna tak tak a awm lo niin a lang," a ti.