Save Tlawng Lui Project tlangzarh

East India Campers Adventure Club, Zotrek Adventure Club leh Mission Vengthlang Adventure Club-te chuan nimin khan Aizawl Press Club-ah 'Save Tlawng Lui Project' tlangzarhna leh vailiamna hun an buatsaih a; Sports & Youth Services secretary Dr Lalrozama'n a vailiam.

Inkhawm hi Ngurthanzaua Sailo-in a kaihruai a, Jubilee Presbyterian Kohhran upa B Hmingthanruala'n Pathian hnenah a hlân a, R Lallawmsanga'n project a sawifiah. Project hnuaiah hian Romalsawma, Mission Vengthlang chuan Tlawng hnár, Zobawk aṭanga ṭanin Bairabi thlengin Tlawng lui a zawh chhuak dawn a, ni 10-15 chhungin a zawh chhuak tura beisei a ni.

Save Tlawng Lui Project tum tlangpui
1) Tlawng lui, mipui tui tlan ber humhalh a ṭulzia leh pawimawhzia inzirtir.
2) Plastic bawlhhlawhin Tlawng lui a tihbawlhhlawhzia leh plastic bawlhhlawh sawngbawl ngaih pawimawh a ṭulzia khua leh hmun remchang apianga inzirtir.
3) PHE department aṭanga water purity testing kit hmangin khawi laiah nge Tlawng tui a bawlhhlawh zual tih endik a, chumi hmun khua leh lui pawh tute hnena zirtirna pek.
4) Tourism spot atana hmun ṭha leh remchang zawn chhuah.
5) Ṭhalaite rilru adventure sport lama cho chhuah a, ruih theih thil leh zûk leh hmuama insûm pawimawhzia lantir.