Bangladesh minister a lo zin dawn

Bangladesh Commerce minister Tipu Munshi chu April 22, 2022 khian Mizoramah a lo zin dawn a, lo dawnsawn dan tur nimin khan Commerce & Industries minister Dr R Lalthangliana leh sorkar hotute’n an rél.

Ruahman dan chuan, Bangladesh minister Tipu Munshi leh a hote chu April 22, 2022-ah Aizawl an thleng ang a, April 23, 2022-ah Dr R Lalthangliana hoin Silsuri leh Kawrpuichhuah an tlawh dawn a, April 25, 2022-ah Mizoram chhuahsanin Kolkata an pan ang.

Dr R Lalthangliana chuan, Kawrpuichhuaha integrated check post (ICP) leh Mamit district-a Silsuri khuaa border haat-te chu Bangladesh Minister nen a huhoa enfiah an tum thu a sawi a, “Bangladesh lamin insumdawn tawnna turin ruahmanna thui tak an kalpui tawh a, keini lam pawhin theihtawp kan chhuah a, mahse, state-in a tih theih chin a awm a, thil ṭhenkhat chu central lama Home Affairs, External Affairs leh Finance-te tih tur a ni,” a ti.