Thla 3-6 daih buhfai chhêk khawl a ni - Supply Minister

Food, Civil Supplies & Consumer Affairs (FCSCA) minister K Lalrinliana chuan nimin khan Rengdil leh Tuidam khuaah Supply kudam thar a hawng. Minister chuan, kumin fûrpui hmain Mizorama buhfai kudam 79-ah thla thum aṭanga thla ruk daih tur buhfai chhêk khawl a nih thu a sawi.

K Lalrinliana chuan, hripui léng avanga mipui harsatna hriain sorkarin AAY leh PHH tana a thlàwna buhfai a sem ṭhin chu September 2022 thleng chhunzawm a nih dawn thu a sawi a, “Kumin fûrpui hmain Mizorama kudam 79-ah thla thum aṭanga thla ruk tla tur buhfai chhêk khawl a ni a, sorkarin ráltlân mi 15,981 hnenah buhfai quintal 950 a pe tawh,” a ti.

Mizoramin eirawng­bawlna gas hnianghnâr tak a neih theih nan chak taka hmalak a nih thu sawiin Minister chuan, “Ni khata truck phur 15 thleng ṭhin kha tunah chuan truck 24 kan dawng tawh a, Mualkhang Gas Bottling Plant tihchangtlun a, gas chhêk khawlna turin hmalak mek a ni,” a ti a; Rengdil leh Tuidam khuain kudam thar an nei chu a lawmpui thu leh neitu rilru púa an enkawl a beisei thu a sawi.

FCSCA Minister chuan, SEDP hnuaiah first instalment dawng tur mi 60,000 thlan chhuah an nih thu leh eizawnna ngêlnghet dinna atan an hman a ṭul dawn thu a sawi bawk.