Kuminah sikserh vangin mi 3 thi

Department hrang hrang intèlkhawmna, State Level Task Force Committee on Malaria Elimination chu nimin khan Health secretary H Lalengmawia hoin an ṭhukhawm a; kumin (2020) chhungin, May thla thleng khan Mizoramah sikserh vangin mi pathum an thih tawh thu tarlan a ni.

Health Secretary chuan, sikserh leh natna dang do kawngah sorkar department hrang hrang, kohhran leh khawtlang hruaitute an pawimawh vek tih sawiin, "Malaria ûmbo hna hi Health department thawktute chauh tih theih a ni lo. Khawtlang mipuite nen nasa taka ṭanho a ngaih avangin village level-ah malaria programme hrang hrangte nasa lehzuala kalpui a ngai a ni," a ti.

Department hrang hrang aiawhte chuan, sikserh do kawnga hma an lak ve theih dan tur leh Health department thawhpui an inhuam thu an sawi hlawm. Meeting-a tarlan danin, kumin January-May chhung khan Mizoramah sikserh vei mi 2,317 hmuh chhuah a ni a, mi pathumin an thihpui. Nikum chhung khan Mizoramah sikserh vei mi 8,543 an awm a, chu'ng zinga pariat chu an thi a ni.