Theihtawp chhuah turin chah
School Education minister Lalchhandama Ralte chuan, sorkar sikulah zirlai an pung zel nia sawi nawnin, zirtirtute chu an hnaah theihtawp chhuah a, missionary rilru púa thawk turin a chah.
Nimina East Phaileng, Kepràn, Sunhluchhip leh North Serzawl a tlawhnaah thu sawiin Lalchhandama Ralte chuan, "Kumina sikul bul ṭan chhoh mekah sorkar sikulah enrolment a pung. Classroom mamawh belh te, naupang ṭhutna tur ṭhutthleng leh dawhkan mamawh belh te, zirtirtu mamawh belhte leh kil hrang hrang aṭanga mamawhte department-in a dawng a ni," a ti.
Education Minister chuan, mipuiin an ro hlu ber an fate sorkar sikula an dah chuan sorkarah rinna an nghat tih a lantir nia sawiin, "Sorkar sikulah naupang an pun avang hian zirtirtute'n an hnaah theihtawp chhuah a, missionary rilru pu chunga an thawh a ṭul," a ti a; khawvel awm zel tur chu zirnaah a innghah zel dawn avangin ṭan la deuh deuh turin zirtirtute a chah a ni.