BJP nen inzawm chi kan ni lo - Zoramthanga

MNF chuan nimin khan May 5, 2022-a MADC inthlanpui lo awm tur atan Siaha Bazar traffic point bulah MPF kaihhruaiin campaign inkhawm an buatsaih a; thu sawitu MNF president Zoramthanga chuan, MNF chu BJP nena inzawm chi an nih loh thu a sawi.

MNF President chuan, India ramah Indian National Congress nasa taka an tlukchhiat thu sawiin, "Mizoramah pawh zu zuarin an tlahniam ta ruai ruai a ni. Siahaah ngei pawh MADC-ah Congress sorkar chu ṭhiatin BJP an zawm ta vek a ni. BJP hi an pute biak pathian ngaihtuah ila, keini nena inzawm chi kan ni lo," a ti.

Mizoramin hun khirh tak a hmachhawn thu sawiin Zoramthanga chuan, "Covid-19, Myan­mar ram buai vanga refugee kan buaipui­nate leh thil dang tam tak har­satna kan tawh avangin dam khawchhuah hna kan buaipui a ni," a ti a, tunah chuan ram hmasawnna hna thawh theih a nih tawh dawn thu a sawi.

MNF President chuan, MNF chu kum 1960 aṭanga nghet taka ding a nih thu sawiin, "Pathianin mal min sawm a, Lalpa'n he ram enkawl tur hian min la ruat rih a ni. Thil awmzia thlir chungin, he inthlanna lo awm turah hian kan hmachhawp leh central sorkarin mal­sawmna tam tak min pek hmang ṭangkaitu ni a, MNF vote ṭheuh turin mipui ka sawm a ni," a ti.