KHAWTHLIR

Thisen pe
KṬP, Kolasib Vengthar Branch chuan an din champha vawi 40-na lawm nan nimin khan Kolasib District Hospital tan thisen unit 44 an pe a, petute mipa 28 leh hmeichhia 16 an ni. Bunghmun khuaa Bial ṬKP leh PYD-te pawhin Lunglei Civil Hospital tan thisen unit 71 an pe a, petute mipa 63 leh hmeichhia pariat an ni.

Ruihhlo laka inven dan inzirtir
Social Welfare & Tribal Affairs department hnuaia Mizoram Social Defence & Rehabilitation Board leh Ministry of Social justice & Empowerment hnuaia National Institute of Social Defence chuan nimin khan J Thankima College-ah ruihhlo laka invèn leh damdawi hman sual laka invèn dan zirhona an buatsaih a, zirtirtu leh zirlai 150 vel an tel.

Thukphum
Information & Public Relation minister Lalruatkima chuan nimin khan Aizawl West College-ah Mizo ziaktu lâr leh hranghluite lehkhabu ziah, an sûlhnu chhui zauna leh zirchianna 'Thukphum' tih lehkhabu a tlangzarh. Lehkhabu hi Aizawl West College-a Mizo department buatsaih a ni.

CM-in chawlhbuk sakna tur a tlawh
Chief minister Zoramthanga chuan nimin zing khan Lawngtlaia chawlhbûk sakna hmun tur a tlawh. Chawlhbûk sakna tura ruahman chu Lawngtlai DC quarters hlui bul a ni. CM hian Thawhṭanni khan Lawngtlai a thleng a, Lawngtlai East bialtu MLA H Biakzauva, LADC chief executive member V Zirsanga leh official-te'n an lo hmuak a ni.

Exhibition buatsaih
Art & Culture department chuan nimin khan Lok Sabha MP C Lalrosanga’n SAGY hnuaia model village atana a thlan, Muallungthu khuaah an director Hmingthanzuala hoin Art & Culture Public Relation and Outreach programme an buatsaih. Mizo thil hlui leh lehkhabu pho chhuahna (exhibition) an buatsaih bakah, Mizo hnam làm leh zai chi hrang hrang an entir a ni.

PUC-ah job drive
Mizoram University leh Pachhunga University College chuan nimin khan PUC-ah hna lâk rûnpui (job drive) an buatsaih a, MZU vice chancellor Prof. KRS Sambamsiva Rao-in a hawng. Drive-ah hian Hyderabad aṭangin Shri Proskill leh Bangalore aṭangin Omega Healthcare hotute an tel a, an hnena thawk tur Mizo ṭhalai lak tur an rawn zawng a ni. Job drive hi vawiin chawhma dar 10-ah chhunzawm a ni dawn a, graduate chin, communication skills english-ah nei ṭhate tan tel theih vek a ni. Hlawh structure (CTC) chu cheng nuai 2.6 per annum a ni ang.

Special exam
Mizoram Board of School Education chuan kumin Higher Secondary School Leaving Certificate (HSSLC) Examination-a Covid-19 vei vanga exam thei lote tan special exam an buatsaih dawn a, practical exam bik chu April 26, 2022-ah neih a ni ang. Exam thei tur mi 75 an awm a, zirlaite chu an exam centre pangngaia exam tur leh admit card an neih sa hmang turin an chah a; theory exam hun chu la inhriattir leh tur a nih thu an tarlang bawk.