Nghalchawm mi pahnih sattu a thi ; Mi pahnih tihhlum thubuai nei tawh a ni

April 18, Thawhṭanni chawhnu dar 2 vel khan Mawngthawisi (40) s/o Nituthuna, Sangtea tia hriat chuan Tlawng lui, Nghalchawm balu kài (Boisua kai)-ah Nghalchàwm khaw mi pahnih chu chempuiin a sât a, an hliam ve ve. Mi sâttu Sangtea hi Thawhṭanni zan dar 6 vel khan a thi a, a taksaah hliam eng emaw zat a awm.

Nghalchawm Branch YMA president C Chhuanvawra hnen aṭanga thu dawn danin, Sangtea'n a sahte hi Lalbiaknia (29) s/o T Lalliana (L) leh Lalrinnunga (27) s/o Rangtluanga (L)-te an ni a; an hliam avangin Sairang damdawi-in panpui an ni.

Lalbiaknia chu a tukkhumah a hliam a, a nat deuh avangin Civil Hospital, Aizawl panpui leh a ni a, a dinhmun endik a nih hnuah Sairang damdawi-inah dah leh a ni. Lalrinnunga chu a áwmah a hliam a, a hliam ṭhui a nih hnuah in lama inenkawl turin hawtir a ni.

Sangtea, Lalbiaknia leh Lalrinnunga te hi Tlawng lui kama an awmho laiin an inhnial a, buaina dang awm loin an kal darh a ni. Lalrinnunga leh Lalbiaknia chu tuiah luh tumin lui kamah an ding a, chutih lai chuan Sangtea chu chempui nen thawk ṭha lehin, Lalbiaknia inring lo lai chu a tukkhumah a sât a, Lalrinnunga a sat leh tur chu a lo inrin hman avangin a duh ang takin a sât fuh thei lo thung.

Buaina thlenna hmuna mi dang awm vete'n Lalrinnunga leh Lalbiaknia chu an bawihsâwm nghal a, Sangtea pawh an man nghal. Sangtea hi Nghalchàwm khaw chhungah hruai a ni a, VC House-ah dahin, police an nghah laiin zan dar 6:15 velah a thi nia sawi a ni.

C Chhuanvawra chuan, Sangtea chu khaw chhungah mipuiin kut an thlak lo niin a sawi a, "Luia an awm laiin engtin nge an intih chiah kan hre lo. Hall chhungah kan dah a, páwn lamah kan véng," a ti a; police an thlen hnua hall chhunga an luhin a lo thi tawh niin a sawi.

Nghalchawm YMA President sawi danin, Sangtea hi kum 2018-ah Nghalchawmah a awm ṭan a, mahse, khaw chhungah chuan awm rei loin, Tlawng lui velah a khawsa deuh ber a ni.

Sairang Police Station aṭanga thu dawn danin, Sangtea ruang chu police-in an hlâwm a, nimin khan Lengpui damdawi-inah postmortem a ni. Sangtea taksaah hliam eng emaw zat a awm thu police-te chuan an sawi.

Sangtea hi postmortem a nih hnuah Civil Hospital, Aizawla mitthi dahnaah dah a ni a, nimin tlai thleng khan latu an la awm lo. Police hotute chuan, Sangtea chhungte leh laina hnaivai emaw, a ṭhiante emaw tan ruang chu vui tura lâk theih a nih thu an sawi.

Sangtea hian July 31, 2016 (Pathianni) zan dar 11:30 vel khan chutih laia a awmna khua, Sihhmuiah an ṭhenawma riak mi pahnih - Zokaia (34) leh Lalram­lawma (24) s/o Vanlalnghaka te chu Zokaia inah thinga vaw hlumah puh a lo ni tawh.

Sihhmui khawtlang hruaitute sawi danin, Zokaia hi mahnia awm niin, July 31, 2016 zanah hian Lalramlawma nen an riak dun a, zan dar 11:30 velah Sangtea’n luh chilhin, thingin a vua a ni. Zokaia leh Lalramlawma chu Civil Hospital, Aizawl panpui nghal an ni a, Zokaia chu a tûk August 1, 2016 chawhma dar 11 velah a thi a, Lalramlawma pawh August 1, 2016 zanah a thi ve leh bawk.

July 31, 2016 zana thil thleng avang hian Sairang police-te’n Sangtea chu an man a, IPC Section 326 hmangin thubuai ziah luh a ni. IPC 326 chu hmanraw hlauhawm hmanga mi tihnat thubuai ziah luhna dan a ni a; dan ang chuan mi tihnat dan azirin kum 10 thleng emaw, dam chhung emaw tàntir theih leh pawisa chawitir theih a ni a, hremna nêp thei ber (minimum punishment) erawh tarlan a ni lo.

Sangtea laka IPC 326 tlawhchhana thubuai ziah luh chhan chu, kut an inthlâk tirhah Zokaia leh Lalramlawma te chu an thih nghal loh vang a nih thu police-te chuan an sawi a; thubuai buaipui mek a nih laia an thih avangin chargesheet-ah chuan IPC 302 (tualthah thubuai) pek a nih thu an sawi bawk.
IPC 326 leh 302 hmanga thubuai siamsakte chu danah chuan bail theih loh (non-bailable) a ni a, chutih rualin, an dinhmun azirin bail theih dan a awm thu, dan lama mithiamte chuan an sawi.