Kângmei laka invèn dan inzirtir

Mamit district-a Fire & Emergency Services (FES) leh Information & Public Relations department chuan nimin khan IPR conference hall-ah media-a thawkte tan kângmei laka invèn dan inzirtirna, Special Training on Fire Safety & Fire Prevention Programme for Media Personnel an buastaih.

FES leading fireman Lalngurthanga’n thuthar thehdarhtute chu ram leh khawtlang tana mi pawimawh an nih thu sawiin, “A ṭha zawnga mipui kaihruaia zirtir theitu in nih angin in hnena kângmei ven dan tur inzirtirna neih hi mipui tan thil ṭangkai tak a nih ngei ka beisei,” a ti.

Lalngurthanga chuan, Mamit FES-ah thawktu an indaih loh avangin harsatna hrang hrang an tawh thu leh tun dinhmunah fireman paruk leh driver pahnih an awm mek thu a sawi bawk.

Inkhawma tarlan danin, kum 2021 khan Mamit FES-in kângmei ṭum 11 chhuak an ṭhelh a, a tam zawk chu ram kâng a ni. Kângmei chhuak a awmin Mamit Fire Station phone number 0389-2565077 leh 7628026922-ah hriattir turin Mamit district mipui an chah a ni.