Pradhan Mantri Garib Kalyan Yojana inzirtir

Food, Civil Supplies & Consumer Affairs (FCSCA) department chuan nimin khan India-in zalenna a hmuh kum 75-na lawmna, Azadi Ka Amrit Mahotsav pualin Lunglei DC conference hall-ah Pradhan Mantri Garib Kalyan Yojana (PMGKAY) chunchang inzirtirna an buatsaih a, district bawrhsap Kulothungan A-in a hmanpui.

District civil supply officer Carolyn LB Khiangte kaihruai inkhawmah hian Kulothungan A chuan, India ramin zalenna a hmuh kum 75-na lawmna kal zela mi harsa zawk leh chanhaite’n ei leh bâra harsatna an neih phuhru tura sorkar laipuiin PMGKAY kaltlanga a thlawna buhfai a sem ṭhin chu a ṭangkai hle tih a sawi.

FCSCA inspector CT Biakthansanga tarlan danin, PMGKAY chu April 2020 aṭangin a thawh ngana thleng zawh a ni tawh a, April-September 2022 chhungin a thawh rukna kalpui leh tur a ni. Mizoramah chuan Antyodaya Anna Yojana (AAY) leh Priority Households (PHH) chhungkua member tinin thla khatah buhfai kg 5 ṭheuh an dawn bakah, dailuah leh chána sem ṭhin a ni.