Eng sorkarin nge finance minister nei ṭha zawk tih zir chiang turin RRR-a an chah

Mizoram Pradesh Congress Committee (MPCC) chuan thuchhuah siamin, Congress sorkar nge, MNF sorkarin Finance Minister nei ṭha zawk tih zir chiang turin minister of state Robert Romawia Royte an chah.

Robert Romawia Royte-in April 14, 2022-a Armed Veng South community hall-a thu a sawiah, ‘Kan CM Pu Zoramthanga anga thil ti thei leh taima hi hmun dangah an awm ve lo,’ tia a sawi leh, ‘Congress President thar, Aizawl East-II mipui mamawh chháng thei lotu hian Zoram mamawh hi engtin mah a chháng thei lo ang,’ tia a sawi chu an ngaih thutak thu MPCC chuan an tarlang a ni.

CM Zoramthanga leh Finance minister hlui Lalsawta chu Zoram mipui hriat chian ve ve an ni tih sawiin MPCC chuan, Aizawl East-II bialah Lalsawta’n hmalakna lian leh rotling tam tak a siam chunga hna thawk lo ang maia Robert Romawia’n a chhuah chu ṭha lo an tih thu an sawi a, “A bial chhung a hre chiang lo hleah kan ngai,” an ti.

Congress party chuan, CM Zoramthanga thil tih theih leh theih loh chu Aizawl East-II mipuiin an hre chiang ber nia sawiin, “September 2018-a MNF Aizawl East II Block Conference-ah MNF President-in, ‘Aizawl khawpui hi traffic jam awm lohna state capital-ah chuan a awm chhun a ni an tih turin kan siam dawn,’ a ti a, tunah chuan Aizawl chu India ram state capital traffic jam nasatna ber a ni,” an ti a; MNF President-in Aizawl khawpui aṭanga Assam Rifles sawn chhuah an nih tur thu a sawi laiin, tun thlengin sawn chhuah an la ni lo tih an sawi.

Congress president thar Lalsawta lakah mipuiin rinna an nghat mek nia sawiin MPCC chuan, “Amah anga eirûknaa fihlîm an tam lo hle. Finance Minister a nih laiin Mizoram sorkar leibá nasa taka tihhniam niin, a hun takah sorkar hnathawkte’n hlawh an la a, Mizoram chu India ram state-ah GSDP leh per capita income sáng páwl tak a ni phâk a ni,” an ti a; MNF sorkar nge, Congress sorkarin Finance Minister nei ṭha zawk tih ngaihtuah nawn turin Robert Romawia an chah a ni.