Covid-19 vei mi 99 hmuh belh a ni

April 18, Thawhṭanni khan Mizoramah Covid-19 vei mi 99 hmuh chhuah a ni a, positivity rate tlahniamin, 8.40% a ni. Nimin khan hripui vei dam tawh mi 98 chhuahtir an ni a, Covid-19 vei thi an awm lo.

Thawhṭannia hripui vei hmuh thar mi 99-te chu mipa 37 leh hmeichhia 62 an ni a, TrueNAT hmanga hmuh mi pakhat leh RAT hmanga hmuh mi 98 an ni. RT-PCR leh FIA hmanga swab sample endikte an negative vek a, chawlhkar khat chhung (April 11, 2022 aṭangin) RT-PCR hmangin Covid-19 positive hmuh a ni tawh lo.

Covid-19 vei hmuh tamna district-te chu Serchhip leh Saitual district-te an ni a, Serchhip district-a Hmunṭhaah mi 21 hmuh niin, hmuh tam berna khua a ni.

Nimin tlai dar 5 dinhmun angin, Siaha district-ah hripui vei pakhat hmuh thar a awm avangin district 11 zingah Covid-19 positive awm lohna an awm rih lo a; Siaha, Lawngtlai, Champhai, Hnahthial leh Kolasib district-ah mi 10 aia tlem vek an awm tawh laiin, Saitual district-ah mi 163 awmin, an tam fál hle.

IDSP record angin, Mizoramah Covid-19 vei 2,26,271 hmuh chhuah a ni tawh a, mipa 1,05,416 leh hmeichhia 1,20,855 an ni a, mipa aiin hmeichhia 15,439-in an tam zawk. Nimin tlai dar 5 thleng khan mi 2,25,118 (99.49%) chhuahtir an ni tawh a, mi 692 (0.31%) thi tawhin, enkawl mek mi 461 (0.20%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,26,271 chu mi 1,000 zelah hripui vei mi 206 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.