Dikna leh taimakna nen kum tharah hun i hmang ang u - Chief Minister

Chief minister Lal Thanhawla chuan, Mizoram chu ram nuam leh hmasawn chak taka siam a nih theihna atan kum tharah dikna leh taimakna nena hun hmang turin Zoram mipuite a sáwm.

Kum thar pualin Zoram mipuite tana thuchah sawiin Chief Minister chuan, "Kum thar hian eng nge a thlen dawn kan hre lo a, hun zawng zawng hi Pathian kuta awm a ni. Hun ṭha tak kan hman theihna atan Zo hnahthlak zawng zawngte duhsakna ka hlan a ni," a ti.

Lal Thanhawla chuan, kum thar a nih angin, kum liam taa tlin lohna leh fel lohnaahte Pathian hnenah ngaihdam dil a pawimawh tih sawiin, "Zoram nuam, hmasawn chak kan nih theihna atan dikna leh taimakna nen kum thar i hmang ang u," a ti a; fimkhur taka nung turin mipui a chah.

Kum thar chu Zo hnahthlakte tana hun ṭha leh lawmawm tak a nih theih a beisei thu sawiin CM Hawla chuan, "Sorkar ang pawhin kum liam ta kha tluang takin kan hman theih avangin ka lawm hle," a ti a; sorkar a kal tluan theihna atana thawktu sorkar hnathawkte bakah, sorkar neitu mipui mimir chunga a lawm thu a sawi.

Lal Thanhawla chuan, Krismas leh kum thar vuakvetah harsatna lian tham a thlen loh avangin lawmawm a tih thu sawiin, "Ṭha taka hunpui kan hman theih avangin Pathian hnenah lawmthu ka sawi rualin, mipuite thlamuanna atana police leh YMA-te hmalakna lawmawm ka ti hle a ni," a ti.

Mizoram chu India ram pumah HIV/AIDS vei tam awmna state pathum zingah a tel tih sawiin CM Hawla chuan, "AIDS vei an pung zel hi a veiawm hle a, ûm bo turin sorkar, kohhran leh NGO-te kut chauh i nghat lo ang u," a ti a; Mizo mipuite HIV/AIDS vei an pun zel lohna atan hma la turin a sáwm.

Chief Minister chuan, cancer natna vei tamna ber state nih chu ṭha a tih loh thu sawiin, "Cancer vei kan tamna chhan hi zuk leh hmuam a fihlim loh vang leh ei leh in fimkhur loh vang a ni. Zuk leh hmuam ti lo tura ṭan lak a ṭul tawh hle," a ti.