HC judge puitling atan nemnghet
Gauhati High Court judge, Justice Michael Zothankhuma, Mizoram portfolio judge ni mek chu nimin khan additional judge aṭangin judge puitlingah nemngheh a ni.
Nemnghehna inkhawm (swearing-in ceremony) hi Guwahati-a Gauhati High Court-a chief justice Ajit Singh-a pisaah neih a ni a; Chief Justice-in rinawmna thu a tiamtir a ni. Justice Michael Zothankhuma rual hian additional judge dang pahnih - Justice Manojit Bhuyan leh Justice Suman Shyam te judge puitlingah nemngheh an ni bawk.
Justice Michael Zothankhuma hi January 7, 2015-ah High Court additional judge atan lak luh a ni a, Mizorama Judicial district pahnih - Aizawl leh Lunglei enkawltu ber (portfolio judge) atan ruat a ni.
Mizo zingah Michael Zothankhuma bakah hian High Court judge dang pahnih an awm tawh. Justice T Vaiphei, tuna Tripura High Court-a chief justice ni mek chu July 17, 2003-ah additional judge turin lak luh a ni a, February 28, 2005-ah judge-ah hlankai a ni. Justice Nelson Sailo chu November 15, 2016 khan Gauhati High Court additional judge atan lak luh a ni bawk.