Kum thar atan mipuite duhsakna hlan

Mizoram Police chuan thuchhuah siamin, 2017 kum thar duhawm leh muanawm taka hmang ṭheuih turin mipuite duhsakna an hlân a, police hmalakna ṭawiawm zel turin an sáwm nghal.

Kum 2016 Krismas leh 2017 kum thar lawmnate chu harsatna leh buaina lian tham awm loin Mizoramah tluang taka hman a nih thu sawiin Mizoram Police chuan, "Hunpui muanawm taka kan hman theihna atan police-te chuan mihring, lirthei leh hmanrua kan neih chhun chhunte a daihzai thei ang ber tura sem darhin, venhimna kenkawh dan tur ruahmanna kan siam a ni. Kan ruahmanna 100%-in hlawhtling lo mah se, mipui náwlpuite'n muanawm tak karah hunpui kan hman liam theih avangin kan lawm tak zet," an ti.

Mizoram Police-te chuan, muanawm taka hun hman a nih theihna atana anmahni puitu zawng zawngte hnenah lawmthu sawiin, "Tlawmngai pawl hrang hrangte'n hmun pawimawh apiangah duty siama an hmalakna avangin dan kengkawhtute hnathawhin nasa takin awmzia a neih phah a ni. Media-te'n kan hmalakna leh ruahmannate mipui hriata min puanzarsak avangin dan baka che turte nasa takin an tawmim phah a ni," a ti a; hun lo kal zel turah pawh police-te ṭawiawm zel turin tlawmngai pawl leh mipuite an sáwm.

Kum hlui thlan zana hâlpuah hâl lo tura hmalakna a hlawhtling lo chu pawi an tih thu sawiin Mizoram Police-te chuan, "Hâlpuah zuar leh hâl eng emaw zat kan man chung leh, nasa enfiah a chung pawha kan la hlawktling tawk lo hi pawi kan ti hle. He hmalakna hi sorkar duh dan angin, hun lo kal zel turah pawh nasa zawka kenkawh zel erawh kan tum tih mipuite'n min lo hriatsak turin kan ngen a ni," an ti.