Seling MRB-a sum tihchingpen thubuaia Inhnamhnawiha puhte jail-ah dah lut kim

Mizoram Rural Bank (MRB), Seling Branch-a sum tihchingpen leh chheh­relh tumnaa inhnam­hnawiha puhte chu nimin khan jail lamah dah luh kim an ni.

Thu dawn danin, MRB, Seling Branch mana­ger Lalhmufiahi chu sorkar sum tihchingpen leh chhehrelh tuma thil ti nia hriat vangin Mizoram Police-a CID (Special Branch)-te'n December 27, 2016 zanah an man a, December 28 khan Bawngkawn Police Station-ah IPC Section 409 leh 120(b) tlawhchhanin thubuai an siamsak.

Police hotute sawi danin, Lalhmufiahi hian sorkar laipuiin Rs. 500 leh Rs. 1,000 note a tihthih tâk chu a thlengsak theia a insawi avangin YMA leh CID-te'n an enthla a; Lalhmufiahi hnenah mi tírin, pawisa note hlui, cheng nuai 45 thleng tur neiin an insawi a, chumi thleng nan chuan Lalhmufiahi chuan pawisa note thar, cheng nuai 27 a pe thei tih a sawi.

YMA leh CID-te mi tirhte leh Lalhmufiahi inrem dan chuan, Lalhmufiahi'n Rs. 500 leh Rs. 1,000 note hlui, a vaiin cheng nuai 45 chu pawisa note thar cheng nuai 27-in a thlengsak ang a, cheng nuai 18 chu a chang dawn a ni.

An inremna angin Lalhmufiahi pasal, Remruatkima'n cheng nuai 27, pawisa note thar chu Seling aṭangin Aizawlah December 27 tlaiah a phur a, chu chu CID-te chuan Ramhlun North-ah zan dar 6 velah an lo man a ni. A hnuah Lalhmufiahi pawh an man a, mi dang pahnih an man bawk.

Police-te sawi danin, Remruatkima'n cheng nuai 45 thlengna atana note thar cheng nuai 27 Aizawla a rawn phurh thlak hi Rs. 2,000 note thar phêk 1,315, Rs. 500 note thar phêk 117 leh Rs. 100 note phêk 115 a ni.

Hetih lai hian, Seling MRB-a pawisa kim lo zat chu Rs. 42,53,000 vel a nih thu MRB general manager Gulab Basumatary chuan a sawi a; Lalhmufiahi chu December 29-ah a hna aṭangin an chawlhtir tih a sawi bawk. Pawisa kim lo chungchangah hian MRB General Manager chuan December 29 khan Bawngkawn PS-ah FIR a thehlut a ni.

Vanglaini zawhna chhangin police hotute chuan, Seling MRB-a sum tihchingpen thubuaia inhnamhnawiha puh mi palite chu Court thupek angin jail lamah dah luh kim an ni tawh tih an sawi a; an hnuhnung ber Lalhmufiahi chu nimin khan jail-ah dah luh a ni.