KHAWTHLIR

Sum lak theih zat
Reserve Bank of India (RBI) chuan Rs. 1,000 leh Rs. 500 note a tih thih vanga ATM aṭanga ni khata pawisa lak chhuah theih chin atana a bituk Rs. 2,500 ni ṭhin chu January 1, 2017 aṭangin Rs. 4,500 ah a tisang. Hetih lai hian, bank account pakhat aṭanga kar khat chhunga lak chhuah theih zat Rs. 24,000 chu tihdanglam a la ni lo.

In kâng
January 2, 2017 zan dar 6 vel khan Vairengte Field Venga Sawilaia in, Assam type a kâng a, a luahtute bungrua bakah car pakhat leh bike pakhat a kâng chhia. In hi Varthiangmawii te chhungkua leh Kanminlun te chhungkuain an luah a, C Malsawma'n dawr atan a luah bawk.

Lirnghing
Nimin tlai dar 2:50 vel khan Mizoram hmun hrang hrangah lîr a nghing a, thil tihchhiat lian tham a neih hriat a ni lo. Aizawl District Disaster Management Authority tarlan danin, lirnghing hi Tripura-a inṭan a ni a, magnitude 5.3-a ná a ni.

Sorkar pisa
Nimin, January 3 kha kumin atana sorkar pisa hawn ni hmasa ber a ni a, Vanglaini palaiin office hrang hrang a fankualnaah office-te hawn ni mah se, pisa kai an tam lo. Aizawl khawpui pawh ṭum dang aiin a la reh hle a, lirthei leh mihring vei vak an tlem bakah, dawr inhawng lo eng emaw zat a la awm a ni.

ECM tawngtai
Evangelical Church of Maraland (ECM) chuan kum thar tira an tih ṭhin angin nimin khan ram tana ṭawngṭai rualna hun an hmang a, tualchhung kohhran hrang hrangah hman a ni. ECM kohhran ṭawngṭaina thupuite chu - India ram tan leh roreltute tan, Mizoram sorkar leh district council-a roreltute tan, National Highway ṭha taka laih a nih theih nan leh zangnadawmnain Mizorama Kristian nun a tihchhiat loh nan, Look East Policy-in mipuite nunah a ṭha zawnga nghawng a neih theih nan, kohhran inpumkhat nan, Maraland-a V/C, tlawmngai pawlte leh zirlaite tan tihte a ni.