BJP-in 7th. Pay atan hmalak an tum

BJP, Mizoram Pardesh chuan Mizoram sorkar hnathawkte'n 7th. Pay Commission rawtna anga hlawh an lak ve theihna atan sorkar laipuiah hmalak an tum thu an puang.

BJP hruaitute hian nimin khan Aizawl Press Club-ah thuthar thehdarhtute an kawm a; an president Prof. JV Hluna chuan, Mizoramin industry lian leh sum lak luhna lian sawi tur a nei lo tih sawiin, "Mipui tam ber eizawnna nia kan sawi agriculture-ah pawh hralh khawp emaw, mahni intodelhna khawp kan nei hlei thei rih lo. Tun dinhmuna kan sum lak luhna pui ber chu sorkar hnathawk hlawh a ni," a ti.

Prof. JV Hluna chuan, sorkar hnathawk hlawh chu Mizoram sorkarin chhiah a hmuh aṭangin engmah tham an tum lo tih sawiin, "5th Pay a ni emaw, 6th. Pay a ni emaw, a vaiin sorkar laipui aṭanga kan hmuh vek a ni. Sorkar laipuiin 7th. Pay a pawm tawh a, Mizorama sorkar laipui hnuaia hnathawkte pawhin 7th. Pay an la tawh," a ti a; Mizoram sorkarin a hnathawkte 7th. Pay a la pe ve lo chu pawi an tih thu a sawi.

Mizoram BJP President chuan, Mizoram sorkarin a hnathawkte 7th. Pay an hmantir lo chu sorkar hnathawkte zahlohna leh sorkar laipui zahlohna lian taka an ngaih thu a sawi a, "Sorkar laipuiin a pawh tawh leh hman tawh, keini'n kan lo pawm lo ve ringawt mai a. Keini Mizoram BJP chuan Mizoram sorkar hnathawkte'n 7th. Pay an hman theihna atan sorkar laipuiah hma kan la zel dawn," a ti.

7th. Pay nawr chhuah chu Mizoram BJP-te agenda a nih thu sawiin JV Hluna chuan, "Sum thawh chhuah dang kan la nei si lo a, 7th. Pay nawr chhuah a ngai. Hlawh punna sorkar laipui pek vek tur a nih avangin kan hnathawh tur pakhat a ni," a ti a; 7th. Pay hman a nih loh chuan kohhran thleng pawha a nghawng tur thu an sawi.

Mizoram BJP President sawi danin, Mizoram sorkar hnuaia hnathawkte 7th. Pay pek an nih dawn chuan, kum khatah cheng vbc. 563.24 vel mamawh belh a ni.