Vanglaini chawlh chhunga thil thleng Ṭhenkhat

December 23: Zirtawpni

e Aizawlah Zodin Square leh Chanmari kâwn inkarah Coordination Committee on Traffic Management lirthei tlan phal lohna hmun, No Vehicle Zone kalpui a ni. No Vehicle Zone hi chawhma dar 10 leh tlai dar 4 inkarah kalpui niin, Zone huam chhungah lirthei tlân a awm lo a, mipuite zalen takin kawngpuiah an kal thei a ni.

e Central YMA hruaitute leh Food, Civil Supplies & Consumer Affairs director R Lalramnghaka leh officer dangte'n Mizoram aṭangin Manipur-a tuialhthei an hralh ṭhin chungchang an sawiho.

CYMA hian Mizorama tuialhthei vàn chhan chu filling station neitute'n man to zawka Manipur-a hralh tura an thawn chhuah ṭhin vàng nia an hriat thu an sawi a; khawchhak tlangdunga YMA branch

ṭhenkhatte chu Manipur-a tuialhthei phurh luh dan tumin an duty a ni.

Sawihonaah hian petrol leh diesel chu Essential Commodities Act hnuaia control zinga mi a nih avangin a hralh chhuah chungchangah Supply department-in thuneihna a neih angin, ṭan lak dan tur an rel a; Mizorama petrol leh diesel tam tham la lut turte'n identity/document/work order an neih a ṭul a, phalna neite chauhin petrol litre 1,000 leh diesel litre 2,000 chin chung lam an la thei dawn tih an sawi.Mizorama filling station-te chu petrol leh diesel-te Manipur-a thawn lo tura tih an rel a, a ṭul anga hma la turin FCSCA department kutah an dah a ni.

e Chief minister Lal Thanhawla chuan a Discretionary Fund aṭangin Krismas thilpek atan Mizoram district pariata home, damdawi-in, hnuchawm enkawlna tar châwmna in leh chanhai enkawlna hrang hrang 78 tan Rs. 2,58,700 a sem chhuak.

Chief Minister hian Aizawl district tan Rs. 1,26,000, Lunglei district tan Rs. 40,500, Kolasib district tan Rs. 26,500, Siaha district tan Rs. 14,000, Champhai district tan Rs. 18,700, Lawngtlai district tan Rs. 13,500, Serchhip district tan Rs. 14,500 leh Mamit district tan Rs. 5,000 a pe a ni.

e Champhai district mipuite'n zalen leh rálmuang taka Krismas leh kum thar an hman theih nan Champhai SP Brijendra Kumar Yadav hoin Champhai khawpuiah Peace Rally buatsaih a ni. Peace Rally hi Champhai DC pisa, Keifang tlang aṭangin ṭan a ni.

December 24: Inrinni

e Aizawlah Zodin Square leh Chanmari kâwn inkarah lirthei tlan phal lohna hmun, No Vehicle Zone kalpui leh a ni. No Vehicle Zone hi chawhma dar 10 leh tlai dar 4 inkarah kalpui a ni a, Zone huam chhungah lirthei tlân a awm lo.

e Chalfilh group YMA hruaitute'n chawhnu dar 1:30 velah Darlawnah petrol litre 2,000 vel phur 407 truck an man. Petrol hi Manipur-a hralh tum a ni a, a neitu, Thlamuana, Khanpui khua chuan petrol chu Silchar aṭanga a lak niin a sawi. Chalfilh group YMA hruaitute chuan petrol chu Manipur-a a luhpui phal loin, a duh chuan Darlawn leh a chhehvela a lei duhte hnena hralh turin an hrilh a, a tiral duh lo a nih chuan Aizawl lama phur lêt turin an hrilh. Petrol neitu chuan Darlawn leh a chhehvelah litre khat Rs. 80-in a hralh a ni.

e Zanah Damvenga bike pathum rûkbo a ni a, a rubotute leh bike rukbote chu December 27 zanah Aibawk khaw daiah police-te'n an man. Bike rukbote hi FZ vek a ni a, a rubotute ch - Lalruatsanga (26), Zonunmawia (25) leh Lalramnghaka (21), Aibawk khua vekte an nia thu dawn a ni.

e Mizoram sorkar leh Central YMA-in ruihhlo do kawnga thawhona thu an thlun bawhzuiin YMA sub-headquarters, Serchhip hnuaia Anti Drugs Squad leh Serchhip Police leh Excise & Narcotics department ṭangkawpte'n Chhiahtlang dái leh Serchhip Sailiam kâwnah ruihhlo dap beihpui an thlak. Operartion Hmunphiah tia vuahah hian Serchhip district kaltlang tur lirthei chi hrang hrang an endik a ni.

e Krismas urlâwk zan a ni a, ṭhalaite mai bakah, nu leh pa leh naupangte'n Krismas urlâwkin hlim takin hun an hmang. Zanah Central YMA hruaitute'n Aizawl khawpui chhunga YMA branch hrang hrang duty-te tlawh kualin, thingpui lumna senso tur Rs. 2,000 ṭheuh an hlan. CYMA hruaitute hi hlawm hrang hrangah insiamin, police-te nen YMA duty-te an tlawh kual a, AMC ward 19 huam chhunga YMA branch tin duty-te an tlawh kual vek a ni.

December 25: Pathianni

e Krismas ni a ni a, Mizoram hmun hrang hrangah kohhran hrang hrangte leh Mizoram pawna Mizote'n hlim takin an lawm. Krismas-ah hian kohhran hrang hrangte chu chawhma, chawhnu leh zanah an inkhawm a; chawhma inkhawm bàna thingpui ruai buatsaih an awm a ni.

e Kohhran Thianghlimte'n Kidron Valley, Chawlhhmuna Solomona Temple-ah Jerusalem Inkhawmpui an hmang ṭan. Inkhawmpuiah hian Aizawl leh thingtlang hmun hrang hrang aṭangin an kohhran mite an kal khawm a; executive chairman Dr. LB Sailo-in Pathian thuchah an sawi a ni.

e Governor chenna, Raj Bhavan chu kum danga tih ṭhin dan angin a duh apiang tlawh theiha hawn a ni. Raj Bhavan hi chawhma dar 10

aṭanga tlai dar 4 thleng hawn a ni a, mi tam takin an tlawh a; a tlawhtu zinga tam ber chu naupang an ni.

December 26: Thawhṭanni

e Mizoram pumah kohhran hrang hrangte'n Krismas lawmna ruai hlim takin an ṭheh.

e Zing dar 4:30 velah Aizawl New market-a Zir Zir dawr a kâng a, bungrua cheng nuai 15 chuang hû a kâng ral.

e Governor chenna, Raj Bhavan chu a duh apiang tlawh theiha hawn chhunzawm a ni a, chawhma dar 10 aṭanga tlai dar 4 inkarah mi

ṭhahnem takin an tlawh a ni.

December 27: Thawhlehni

e Tuipuiral tlangdunga Teizâng khaw pahnih - Leisenzo leh Sesih khuaah kum tina an tih ṭhin angin, chhungkaw chaw ei khawm, Tianlep rûnpui an nei. Leisenzo leh Sesih khuaa chêng Teizangho chuan Krismas hunpui denchhenin hun rei tawh tak aṭang tawhin Tianlèp hi December 27-ah an hmang tlangpui a, a pualin chhungkaw tam takin vawk vulh ṭhin. Tun ṭuma Tuanlèpah hian chhungkaw 28-in vawk an talh a ni. Tianlèp hi chhungkua, u leh naute induhsakna hun a ni.

e Kohhran Thianghlim hnuaia Youth Evangelical Front, Aizawl West Group-te'n Solomona Temple, Chawlhhmunah blood donation camp an huaihawt a, Aizawl Civil Hospital tan thisen an pe. Thisen hi mipa 243 leh hmeichhia 134-te'n an pe a, an pek zat hi unit 377 a ni.

e Mizorama kohhran ṭhenkhatin Krismas lawmna ruai an ṭheh chhunzawm.

e Krismas chawlh hman a nih hnuah sorkar pisa kai ni a ni a, sorkar pisa hrang hrangte inhawjng mah se, pisa kai an tlem hle. Aizawla dawrte pawh inhawng a tam lo a, kawtthlerahte pawh mipui veivak an la tam lo.

December 28: Nilaini

e Kohhran Thianghlim hnuaia Youth Evangelical Front, Aizawl West-te'n Jerusalem Inkhawmpui pualin Solomona Temple, Chawlhhmunah thisen pek rûnpui an buatsaih chhunzawm a, Aizawl Civil Hospital tan thisen an pe. December 28 bikah hian mipa 236 leh hmeichhia 167-te'n thisen unit 403 an pe a, December 27-a an pek tawh nen ni hnih chhungin unit 780 an pe a ni.

Kohhran Thianghlimte hian kum 2010 aṭangin Jerusalem Inkhawmpui pualin thisen pek rûnpui an huaihawt ṭhin a; kum 2010 aṭanga kum 2015 thlengin thisen unit 2,017 an lo pe tawh a ni.

e Champhai district-a Lungphunlian khuain Pathian hnena inhlan tharna leh sual thupha chawina hun an hmang a, tlaiah ruai an ṭheh nghal.

Lungphunlian khuaah hian Presbyterian Kohhran leh Salvation Army an awm a; kohhran pawl pahnih hruaitute chuan chawhma dar 10 aṭangin Salvation Army hall-ah inkhawm an buatsaih bakah, kawngzawh leh bethel rûnpui an nei a, bethel lung an phun bawk. Presbyterian Kohhran biak-inah hun tawp siam a ni.

December 29: Ningani

e Serchhip Chanmari Branch YMA-in Rajya Sabha MP Ronald Sapa Tlau fund hmanga library building an sak thar chu YMA sub-headquarters, Serchhip finance secretary Thangngaizuala'n a hawng. Building hi Rs. 3,00,000 senga sak niin, a dung ft. 18 leh a vâng ft. 12-a zau a ni.

December 30: Zirtawpni

e INTACH Mizoram Chapter bultumin Mizo zinga Kristian ni tura hming pe hmasa ber, Taibawnga leh sap zinga Mizorama missionary thi hmasa ber, Dinwiddie-te hriatrengna lungphun siam thar chu INTACH Mizoram Chapter secretary Thanseia'n MacDonald Hill, Zarkawta Bàwlhmun ṭhinah a hawng. Hawnna inkhawmpui hi minister Lal Thanzara pawhin a hmanpui a ni.

INTACH hian CM Office gate bulah kum 1994 khan Taibawnga leh Dinwiddie te lungphun an phun tawh a, lungphun thar siamna atan hian bialtu MLA Lal Thanzara'n MLA fund aṭangin Rs. 4,06,000 a pe a ni.

e Zanah Madras Christian College, Chennai-te'n Chanmari Presbyterian Kohhran biak-inah zaia rawngbawlna an nei. He hunah hian MCC zirlaite bakah, TNT Naupang Zaipawl, The Leprosy Mission Choir, Mizo Cardinal Choir, TBZ Choir, Aizawl Youth Orchestra, Presbyterian kohhrana Ramhlun Bial Zaipawl leh Chanmari Bial Zaipawl-te an zai bawk.

e Govt. Aizawl College Alumni chuan GAC-a associate professor Lalrinmawii Khiangte hnenah thu leh hla phuah lama an hlawhtlinna avangin chawimawina an hlan.

GAC Department of English-a associate professor Lalrinmawii Khiangte thuziah 'For a better tomorrow' tih chu kum 2011 khan 'Writings from North East India' ah Oxford University Press-in a tichhuak tawh a, kum 2016 khan Christ University, Bangalore chuan college zirlaibu a telh turin a thlang a ni.

'For a better tomorrow' tihah hian Mizote hmasanga an nun dan, khawtlang nun, hnam zia leh politics-te leh Mizoram tana hmakhua

ṭha tak beisena chungchang a tarlan a ni.

e Governor Lt.Gen. Nirbhay Sharma chu phai lamah a zin thla a, January 8, 2017-ah Aizawlah rawn lêt leh tura beisei a ni.

e Police-te'n Aizawl bazar leh a chhehvel an endik a, Assam Rifles canteen-ah hâlpuah báwm thum, Rs. 5,600 man an man. Aizawla police-te hian December 1-30 inkarah silai lem, a mu kap chhuak thei Rs. 2,00,000 chuang hû leh hâlpuah tam tham tak an man a ni.

e Central Young Lai Association (CYLA) kumpuan, 'Ram leh hnam humhalh' bawhzuina kal zelah South Lungpher YLA leh VDP

ṭangkawpin Kristmas vuatveta ruihhlo an mante chu Bualpui (NG) Police Outpost-a officer in-charge kaihhruainain an tichhia. Ruihhlo an tihchhiatte hi tualchhunga an hralhna anga chhûtin Rs. 92,000 chuang hû a ni.

e Tuikual luiin Tuithûm lui a finna thlen hma lawkah mipa naupang Lianthansang (5) s/o Thenneihchhing, Lamka, Manipur chu thiin chhar a ni. Thu dawn danin, Lianthansang hi a nu leh a ú nen Mizoramah rawn zinin, Govt. Complex-ah an chhungte tlawhin an lenpui a; Lianthansang chu December 29-ah boin, zawn zui a ni a, Tuikual luiah thiin an hmu ta a ni.

December 31: Inrinni

e Tlabung MZP hruaitute Tlabung bul, Khojoysury khuaah an kal a, December 30-a Chawilung khua aṭanga Khojoysory khuaa Mizote bazara kal Chakma tlangval ṭhenkhatin an vau chungchangah ti tawh lo turin an hriattir.

MZP Sub-Headquarters, Tlabung thuchhuah tarlan danin, Chawilung khuaa Mizo ṭhenkhat, Khojoysury-a kalte chu Chakma ṭhenkhatin vauin an zìm a, vuak hlumahte an vau a ni. Bazara kal ve Chawilung VCP-in bán phara khawngaihna a dil chungin ṭawngkam chhe tak takin an ṭawng a ni.

Tlabung MZP hruaitute chuan Khojoysury V/C leh Young Chakma Association hruaitute chu ko khawmin, Chakma tlangval ṭhenkhatte chêt dan avangin an lungawi loh thu an hrilh a; Chawilung khua chu Mizo in 20 vel chauh ni mah se, zuam viau tawh lo tura chahin, Mizote chhan nan an ngawih mai mai dawn lo thu an hriattir a ni.

January 1: Pathianni

e Mizoram puma kohhran hrang hrangte'n Krismas an lawm a, chawhma, chawhnu leh zanahte Pathian biak inkhawm an neih bakah, inkhawm kar lakah an zaikhawm.

e Mizoram sorkarin hâlpuah leh hâlmawi chi hrang hrangte khap mah se, kum thar 2017 lawmna leh 2016 thlahna atan

Aizawlah chuan hâlpuah leh hâlmawi hmuh tur tam tham tak a awm. Kum thar lawm nan hian veng hrang hrang aṭangin meithallawn chhuah hmuh tur a awm bawk.

e Kum hlui thlahna leh kum thar lawmna vuakvêtah hian Mizoram chhungah chetsualna thleng hriat tur a awm meuh lo a, khawpui ber Aizawlah pawh boruak a muanawm hle niin police hotute chuan an sawi.

e Kolasib dái, Rengtekawnah hmeichhe pakhat chu pawngsual rawn a nih vangin Kolasib Police Station-ah thubuai ziah luh a ni. Pawngsual rawn tâwktu hmeichhia hi January 1-ah damdawi-inah endik a ni a; pawngsualtua puh zinga mi ṭhenkhat chu police-in an man tawh a ni.

e Salvation Army-a nihna sang ber, Commissioner-a Mizo zinga kai hmasa ber Chianghnuna a thi a, January 2-ah vui a ni. Chianghnuna hi India Western Territory-ah Commmander niin a chawl a, a nupui Barbara Chianghnuna leh a fate a kalsan.

e Veng paruk YMA branch-te'n an din, Samkhuih Joint Operation-in ruihhlo an man sate chu World Bank road-a Chite lei bulah SRS convener R Lalngheta'n a hâl ral. Ruihhlo hâl ralte hi heroin cane 5 leh chhìn sen 2 leh ganja pocket li a ni a; sap zu ûm puitling 56 leh ûm chanve 28, beer can 27 leh rakzu fûn 32 an leih baw bawk. Samkhuih Joint Operation-ah hian Falkland Veng aṭanga Salem Veng inkara veng paruk - Bethlehem Veng, Bethlehem Vengthlang, College Veng, ITI Veng, Chite Veng leh Falkland Veng YMA-te an tel a ni.

January 2: ThawhṬanni

e Mizoram pumah kum thar 2017 lawmna ruai ṭheh a ni. Kuminah kum thar ni tak chu Pathianni-ah a tlak avangin kohhran hrang hrangte'n January 1-ah ruai an ṭheh lo hlawm a, January 2-ah an ṭheh deuh vek a ni.

e Mizote zinga Salvation Army-a nihna sang ber, Commissioner-a kai hmasa ber Chianghnuna, January 1-a thi chu an ina thlah a nih hnuah Aizawl Temple-ah vui a ni.

Chianghnuna hi June 19, 1029-ah a piang a, kum 1950-ah Salvation Army officer atan lak a ni. S.A officer niin, chanvo hrang hrang a chelh hnuah kum 1988-ah Colonel-ah kaiin, Mumbai-ah a awm a; kum 1992-ah Commissioner-ah a kai leh a ni.