June 30 thleng inkhârkhip kalpui chhunzawm zel dawn
Mizoram sorkar chuan June 8-22 chhunga inkhàrkhip (total lockdown) a kalpui mek chu kalphung ṭhenkhat tidanglam deuhin, June 30, 2020 thleng a pawtsei. Inkhàrkhip thawh rukna chu zanin zanlai hian a tàwp dawn a; a thawh sarihna (Lockdown 7.0) atana inkaihhruaina chu chief secretary Lalnunmawia Chuaungo-in nimin khan a tichhuak a; AMC area, district headquarters leh containment area-ahte chuan phalna nei lo tan pawn chhuah khap chhunzawm zel a ni.
SDMA State Executive Committee Chairman leh chief secretary ni bawkin nimin tlaia lockdown guideline a tihchhuah hian kaihhruaina hmasa a luahlân (supercede) dawn a ni.
Lockdown 7.0 hnuaiah hian Aizawl Municipal Corporation (AMC) area, district hradquarters zawng zawng leh containment area-a sorkarin a puanahte khauh zawka inkharkhip zel tur a ni a, phalna nei lo chu mahni in leh compound chhuahsan khap a ni.
Hemi chhungah hian phalna nei bik dawr chiah hawn phal a ni dawn a, phalna nei zingah hian nitin mamawh (essential commodity) zuar, damdawi zuar, kuthnathawktute mamawh zuar, hnathawhna mamawh bungraw zuarte an tel a; damdawi dawr ni lo dawr dang zawng hi tlai dar 5:00-ah khar tur a ni ang.
Ramri zawng zawng khàr chhunzawm a ni dawn a, Mizoram sorkar phalna nei loa state chhunga luh phal a ni lo. State páwn aṭanga Mizorama lo lutte khung hran (quarantine) hun ni 21 a ni a, hemi chhung hian RT-PCR test an ti tur a ni.
Covid-19 léng vangin March 22, 2020 khan prime minister Narendra Modi thuchhuak angin India ram pumah darkar 24 chhung Janata Curfew a neih a ni a, a tûk March 23 aṭangin Mizoram sorkar chuan inkharkhip pumhlûm (total lockdown) a puang zui nghal.
Sorkar laipuiin March 24 zan zanlai aṭangin India ram pumah total lockdown a puang ve leh a, June 30 thleng turin pawhsei a ni tawh a, kalphung erawh a danglam hret hret.
State páwna Mizo tangkhang rawn hawte zingah Covid-19 vei hmuh chhuah a nih hnu, June 8-ah chief minister Zoramthanga hoa mi pawimawhte ṭhukhawm chuan, Mizoramah chawlhkar hnih chhung khauh zawka inkhàrkhip (total lockdown) an rèl. June 8 zanlai aṭanga khauh zawka inkharkhip puan chu zanin zanlaiah a tàwp dawn a, Mizoram sorkar chuan total lockdown hi June 30 thleng a pawtsei leh dawn ta a ni.
Lockdown 7.0 kaihhruaina tlangpui
• Lockdown 7.0 hnuaiah hian ramri zawng zawng khàr chhunzawm a ni dawn.
• Zirna-in leh sakhaw biakna hmunte khar chhunzawm tur.
• Ṭul bik thilah lo chuan mahni in leh compound chhuahsan phal a ni lo.
• Zan dar 7:30 leh zing dar 4:30 inkarah páwnchhuah khap tlat a ni.
• Sorkar hnathawk group C leh D-te a zatvein an inkal chhâwk ang.
• Mimal eizawnna hna - puanṭhui, puantah, carpentry, fabrication, bakery, adt. te phalna lâk ngai loin kalpui theih.
• Inneih inkhawm leh mitthi vuinaah mi 35 aia tam tel loh tur.
• Dawr, office, damdawi-in leh vantlang hmuna chhuak tur reng rengin hmai tuam ngei tur.
• Hna thawhna hmunah ṭum khatah mi panga aia tam thawh loh hram ni se.
• Aizawl, district headquarters leh containment area-ahte dawr leh sumdawnna hmun hawn khap a ni. DC-te leh task force-te ruahman angin ni tin mamawh leh bungraw zawrhna dawr hawn hun siam a ni ang.
Lockdown 7.0 kaihhruaina tlangpui
(Guideline-a mi tihlan kim vek a ni lo)
International & state border khâr chhunzawm a ni dawn.
Bairabi, Vairengte leh Kanhmun kaltlangin mipui ni tin mamawh leh Home department-in phalna a pek bungruate lak luh theih a ni.
Mizoram sorkar phalna nei loa Mizorama luh khap a ni.
Phalna neia lutte tan entry point-ah screening kalpui zel a ni dawn.
State páwna tangkhangte haw dan tur ruahman zel a ni ang.
Mizorama lutte sorkar/community/hotel/home quarantine-ah ni 14 chhung an awm tur a ni, mCOVID-19 leh Aarogya Setu-ah in register vek tur.
State páwna bungrua laa zin driver leh handyman-te sorkar quarantine facility-ah an khawsa ang a, load an lâk hnuhnun ber aṭanga ni 14 hnuah an inah haw phal a ni ang.
Aizawl, district headquarters leh containment area-ahte dawr leh sumdawnna hmun hawn khap a ni. DC-te leh task force-te ruahman angin ni tin mamawh leh bungraw zawrhna dawr hawn hun siam a ni ang.
Mimal eizawnna hna - puanṭhui, puantah, carpentry, fabrication, bakery, adt. te phalna lâk ngai loin kalpui theih.
Khaw dang zawngah chuan dan pangngaiin dawr leh eizawnna kalpui theih a ni a, DC-te'n kaihhruaina/khuahkhirhna an siam thei.
Task force-te'n thlai/chawhmeh lei leh hralh danah ruahmanna an siam thei.
Damdawi dawr tih loh dawr dang zawng tlai dar 5-ah khâr vek tur.
Zirna-in leh sakhaw biakna hmunte chu khâr zel a ni dawn a; administrative office erawh hawn theih a ni.
Inneih lawmna (reception), lungphun, anniversary leh birthday lawmna, games & sports tournament, lehkhabu tlangzarh, pawl thila kal khawm, intihhlimna reng reng huaihawt phal a ni lo.
Inneih inkhawm leh mitthi vuinaah mi 35 aia tam tel loh tur.
Aizawl, district khawpui leh containment area aṭanga luh leh chhuah (zin veivah) khap a ni. Lockdown hmaa zin chhuakte hawna, dam lohna (medical emergency) leh chhiat tawh thila chhungkhatte veivahna a huam lo. Zin turin phalna lak a ngai.
Lirthei tlân phal lohin a huam lohte - Covid-19 duty sorkar hnathawkte motor, ambulance leh medical/veterinary emergency-a hman motor, damdawi-ina thawk te, print & electronic media-a thawk te, kohhran motor, bawlhhlawh paih motor, bawnghnute phurh/semna motor, bank-a thawk te, telecom service duty motor, local task force duty-te motor, khaw kar kawnga bus, maxicab service, phai aṭanga bungraw phur luttu motor.
Aizawl leh district khawpui aṭanga feh turte zing dar 4:30 - 7:00 inkarah khawpui an chhuahsan tur a ni a, tlai dar 5:00 - 7:30 inkarah in an thleng hman tur a ni. Feh turin task force aṭangin phalna lak a ngai.
Mi panga aia tam pun khawm khap a ni.
Ṭul bik thilah lo chuan mahni in leh compound chhuahsan loh tur.
Advocate, court-a an inlan a ṭul ní-ah an chhuak thei. An court ní a ni tih finfiahna, cause list an keng tur a ni.
MSACS hnuaia ART, OST leh syringe needle exchange kalpui tura ruat bik NGO member, hna an thawh ní bikah an chhuak thei.
Pastor, kohhran upa leh rawngbawltute tul bik thila kohhranin rilru leh thlarau lama harsatna tâwkte tana rawngbawl tura a ruat bikte an chhuak thei a, kohhran lehkha neih a ngai.
Class X leh XII board examination tur buaipuitu official-te leh exam turte an chhuah a ṭul ni-ah an chhuak thei.
Zan dar 7:30 leh zing dar 4:30 inkarah páwnchhuah khap tlat a ni. Magistrate-te'n khuahkhirhna thupek an chhuah ang.
Dawr, office, damdawi-in leh vantlang hmuna chhuak tur reng rengin hmai tuam ngei tur.
Vantlang hmunah metre 2 tala inhlata awm tur.
Loh theih loh thila chhuah ngaite'n task force/magistrate aṭangin phalna lak tur a ni a, lirtheia chhuak tur tan Traffic SP phalna lak tel a ngai.
Health department, Police, Home Guard, Civil Defence, Fire & Emergency Service, Disaster Management, Civil Aviation, Prison, Excise & Narcotics, municipal service, Forest field work, PHE leh P&E department-a technical staff-te leh, Aizawl tih loh khaw dang zawnga sorkar pisate a pangngaiin (full strength) an kal ang.
Department dang zawngah chuan Aizawl leh district khawpuiah group A officer-te an vaiin an kal ang a, group B-te a zatve an kal ang a, group C & D-te hmun thuma ṭhena hmun khatin an inkal chhâwk ang.
Office-ah phalna la hmasa loin páwn lam mi luhtir loh tur.
Khaw dang zawngah a pangngaia kal tur a ni.
Sorkar hnathawk hrisel lohna nei leh nau paite chu medical certificate ngai loin hotute'n commuted leave an pe thei.
Sorkar laipui leh bank hnathawkte chu an hmanpui aṭanga kaihhruaina angin an kal ang.
Mi pathum aia tamin dawr pakhat an nghak tur a ni lo; wholesale dawr leh dawr lianah erawh chuan mamawh dan azirin mi paruk thleng an awm thei ang - task force remruat dan angin.
Dawr nghaktute'n hmai tuam vek tur.
Hna thawhna hmunah ṭum khatah mi panga aia tam thawh loh hram ni se.