MPCC vice president aṭangin H Liansailova'n chawlh dil

H Liansailova, Bawngkawn Chhimveng chuan Mizoram Pradesh Congress Committee (MPCC) vice president a nihna aṭanga chawlh a dil a; MPCC President hnenah dilna a thehlut.

Vanglaini palai zawhna chhángin H Liansailova chuan, kohhran rawngbawlna hna avanga chawlh dil a nih thu a sawi a, "Rawngbawlnaah dinhmun sang zawk chelh tura ruat ka ni a, chuvangin, MPCC lama ka nihna nen chelh kawp rem chiah loah ka ngai. Thûk zawka rawngbawlnaa inhman ka tum vang a ni ber," a ti.

Politics a chawlhsan dawn leh chawlhsan dawn loh zawhna chhangin H Liansailova chuan, ngaihtuahna a la sèn loh thu leh rawngbawlna lam chiah a ngaihtuah rih thu a sawi.

H Liansailova hi Bawngkawn Chhimveng Presbyterian kohhran upa a ni a, Aizawl Hmar Presbytery moderator atan ruat thar a ni.

MPCC chuan thuchhuah siamin, H Liansailova chuan an party a chhuahsan loh thu tarlangin, "Kohhrana rawng­bawlna pawimawh tak a chelh tak avangin party-a nihna pawimawh a chelhte chawlhsan rih a duh thu a thlen mai a ni," an ti.