Ramria duty thi sorkarin a rál

Covid-19 laka invenna atana Mizoram-Assam ramria duty-naa chesual a, June 19, 2020-a thi Lalpianvula (65), Zawlnuam Bawrai chu Mizoram sorkarin Chief Minister's Relief Fund-a mipui thawh khawm aṭangin Rs. 1,00,000-in a rál.

CMRF aṭanga ràlna sum hi chief minister PS Lalhmansanga'n Inrinni khan Lalpianvula nupui Lalchhanhimi hnenah a hlân. Lalpianvula inenkawlna atan CMRF aṭang hian Rs. 30,000 pek a lo ni tawh bawk.

Mamit DC Dr Lalrozama chu Lal­pian­vula vuinaah a tel a, DC office aṭanga ràlna Rs. 5,000 leh Health minister Dr R Lalthangliana'n a ràlna Rs. 10,000 chu a chhungte hnenah a hlân a ni.

Tarlan tawh angin, Lalpianvula hi May 15, 2020 khan ramria an duty-na hmun aṭanga chawchhùn ei tura in lam pana an haw chu an chuanna motor (Pik-Up) aṭangin a tla a, hliam na tak tuarin, thla khat chuang damdawi-ina enkawl a nih hnuah a hliam tuar loin June 19 zan dar 7 vel khan a thi a; June 20 khan Aizawl Civil Hospital-ah post mortem niin, hemi ni vek hian an inah vui a ni.