Tualchhunga hripui kái 37-te an kai ṭanna hriat vek a ni

Mizorama Covid-19 hripui vei, November 23, Thawhṭannia hmuh chhuah mi 50 zingah Mizoram chhunga kái chhâwng (local positive contact) mi 37 an awm a, hri kai ṭanna hriat theih loh an awm lo.

Sorkar thuchhuah aṭanga a lan danin, hripui vei hmuh thar, tualchhunga kái mi 37-te chu Aizawla veng pangaa mi  leh khaw dang pathuma mite an ni a; Aizawla mi paruk leh khaw danga mi 31 an ni. Khaw danga mite chu - Lawngtlaia mi 11, Thingkah (Lawngtlai bul)-a mi 11 leh Zokhawthara mi pangate an ni.

Mi 37-te chu an kai ṭanna hriat theih vek an ni a, natna (Covid-19 symptom) lang chhuak mi 14 an awm. Kum 60 aia upa mi panga an awm a; chu'ngte chu - Ramhlun Vengthara hmeichhia kum 87, symptom nei te, Zokhawthara mipa kum 73, symptom neite leh, Thingkaha mipa kum 73 leh hmeichhia kum 80 leh kum 68 mite an ni.