Ni 69 chhungin state dang aṭanga vawk 4,083 lak luh phalna pe tawh
Mizoram sorkarin India ram state dang, Porcine Reproductive and Respiratory Syndrome (PRRS) leh African Swine Fever (ASF) lèn lohna aṭanga vawk leh a notê lak luh October 24, 2019 aṭanga a phal hnuah state dang aṭangin Mizoramah vawk 4,083 lak luh phalna mi 29 hnenah pek a ni tawh.
Commerce & Industries department hotute hnen aṭanga thu dawn danin, October 24 aṭanga December 31, 2019 thleng khan AH&Vety Director-in vawk lak luh a remtihsak mi 29 hnenah state dang aṭanga Mizorama vawk lak luh phalna pek a ni a; mi 29-te chuan vawk 4,083 lak luh phalna an la a ni. Phalna pekte chuan an lâk luh tum zat nen dilna an siam ṭhin a, mi 29-te chuan vawk pathum aṭanga 500 inkar lak luh an dil a ni.
Thla khat chhung bikah chuan, November 2019 khan vawk lak luh phalna la an tam ber a, mi 22 hnenah vawk 3,155 lakluh phalna pek a ni. Nikum December-ah khan mi pathum hnenah vawk 403 pek niin, October thlaah mi pali hnenah vawk 525 lak luh phalna pek a ni thung. January 2020-ah pawh dilna thehlut an awm tawh a, mahse, phalna pek an la awm lo thung. Tarlan tawh angin, AH&Vety department hotute chuan, India state zingah PRRS leh ASF a lèn an hriat loh thu an sawi a, India ram state-te zingah vawk lak phal lohna state an neih loh thu leh, India ram páwn aṭanga lak luh erawh khap tlat a la nih thu an sawi bawk.
Hetih lai chian, Aizawl District Magistrate chuan October 29, 2019 khan Cr.PC Section 144 hmanga thupek chhuahin, thla hnih chhung atan Aizawl district chhungah hmun dang aṭanga vawk lak luh khapna a lo puang tawh a; December 11, 2019 khan thla hnih chhung huam turin Lunglei district magistrate K Lalrinzuali pawhin district dang aṭanga Lunglei district chhunga vawk lak luh khap a nih thu a puang tawh bawk a ni. AH&Vety Secretary-in October 24, 2019-a thu a chhuaha a lan danin, PRRS leh ASF lèn lohna state aṭanga vawk la lut turin Commerce & Industries Director-ah vawk lak luh phalna dil tur a ni a, chumi hmain AH&Vety Director remtihna lak phawt a ngai.
Vawk lakna/leina tur farm aṭangin registered vety practitioner siam proper soundness certificate neih tur a nih bakah, vawk lak luh turte chu AH&Vety checkgate-ah endik vek zel tur a ni. Vawk la luttute'n an lak luh zat leh lak luh ní ziakin AH&Vety Director-ah hriattir zel tur a ni bawk. He ruahmanna hian official gazette-a chhuah a nih aṭanga January 31, 2020 thleng a huam.