Central scheme-a hmalaknate sawiho

Lunglei District Development Coordination and Monitoring Committee (DISHA) chu nimin khan an chairman C Lalrosanga, Lok Sabha MP leh co-chairman K Vanlalvena, Rajya Sabha MP hoin video conferencing hmangin an ṭhukhawm a, sorkar laipui scheme hnuaia hmalaknate an sawiho.

C Lalrosanga chuan, DISHA chu sorkar laipui scheme pawimawhte thlirhona leh zirchianna a nih avangin ram hmasawnna atan a pawimawh hle tih sawiin, "RD Ministry leh sorkar hotulu dangte pawhin an ngai pawimawh a ni," a ti a; department hotute chu scheme kalpuinaa harsatnate chu sawi hreh lo turin a chah.

Meeting-a tarlan danin, Lunglei district-ah kum 2019-20 chhungin MGNREGS hnuaiah ni 100 inhlawhna siam a ni a, sum awm zat nuai 9817.062 aṭangin nuai 9807.57 hman a ni. Sorkar kum kal mek 2020-21 ah November 2020 thlengin RD block tinah ni 87 inhlawhna siam tawh a ni a, sum dawn tawh nuai 7639.64 aṭangin nuai 7639.64 hman a ni tawh.

Miretheite in saksakna Pradhan Mantri Awas Yojana - Gramin hnuaiah kum 2019-20 chhungin chhungkaw 343 leh kum 2020-21 chhungin chhungkaw 1,229 a ni a, in sa turin ruahmanna siam mek a ni.

Samagra Siksha hnuaiah kum 2020-21 chhungin primary school 315-ah zirlai 15,404 leh middle school 223-ah zirlai 10,604 an awm a, chu'ng zinga 20,758 (79.81%)-te chu Aadhaar nen thlunzawm a ni tawh bawk.