Sum dinhmun a ṭhat kan beisei - Finance Commissioner

Finance commissioner Vanlal­chhuanga chuan Covid-19 din­hmun a ziaawm chho a, sorkar laipuiin chhiah a hmuh tur ang a hmu thei a nih chuan Mizoram sorkar sum dinhmun a ṭhat zel an beisei thu a sawi.

Vanglaini palai zawhna chhangin Vanlalchhuanga chuan, Covid-19 ziaawm tâk avanga state sum dinhmun a ṭhat dawn leh dawn loh sawi theih a la nih loh thu a sawi a, "Sorkar kum thar a inṭan chauh a, April chauh a la nih avangin kan dinhmun tur sawi theih a ni lo. First quarter (April-July) han zo se, kan dinhmun tur a chiang deuhin a rinawm. First quarter-a sum hmuh dan hi a pawimawh khawp mai," a ti.

Finance Commissioner chuan, Covid-19 avanga sum hman ai mahin, sorkar laipuiin chhiah a dawn khawm aṭanga Mizoramin a chan tura beisei (share on central) a tlahniam chu sum dinhmunin a tuar nasa tih sawiin, "Hetih rual hian, central lam pawhin min pek tur ang min pe lo tih ngawt theih a ni lo," a ti a, central-in an ruahman ang an hmuh bik loh chuan state tan tihngaihna a awm bik loh thu a sawi.

Sum dinhmun a ziaawm chhoh zel an beisei thu sawiin Vanlal­chhuanga chuan, "Covid-19 a hluar thar tawh loh a, sorkar laipuiin chhiah a beisei ang a hmu thei a nih chuan kan sum dinhmunin ngai a awh chhoh kan beisei. Chutih rualin, Covid-19 avanga kan beisei ang sum kan hmuh lohte kha kan la tuar zel lo thei lo. Inrenchem taka kan la kal zel a ngai rih a ni," a ti.

Finance Commissioner chuan, K-deposit leh D3-a sum dahte zawi zawiin an pêk chhuah thu sawiin, "Hei hian Reserve Bank of India-a kan account a khawih dawn a, fimkhur leh uluk taka kal a ngai," a ti a; pension-a chhuakte pawisa dawn tur pawh an pek chhoh zel thu a sawi.

Hlawh chungchangah Finance Commi­ssioner chuan, "Tunah hian March hlawh la lo an la awm a nih pawhin Finance department chuan hlawh tur chu release zel turin Treasury lam kan ti. Hlawh la lo an la awm a nih chuan an department lam muan vangte pawh a ni thei. Sorkar hnathawk hlawh hi ngaih pawimawh hmasakah kan nei a ni," a ti.