Hnam dangin LPT an paltlang dan mak an ti

Mizo Students' Union chuan, Mizoram Rural Bank (MRB)-a thawk hnam dangte'n Mizo­ramah hun rei lo te an awm hnua Language Proficiency Test (LPT) an paltlang mai ṭhin chu mak an tih thu an tarlang a; hei vang hian LPT test/exam buatsaihtu State Council of Education Research Training (SCERT) director Laldawngliani Chawngthu an hmu.

MSU Gen. Hqrs chuan, Nov 18, 2021 khan SCERT-in LPT an buatsaih chu lawmawm an tih rualin, "Mizo ṭawng pawl 8 level exam MRB hnuaia thawk hnam dang, Mizorama rei lo tê chauh la awmte'n an pass vek mai chu hriatthiam har kan ti a ni," an ti.

Hnam dangin hun rei lo te chhunga pawl 8 level Mizo ṭawng an pass thei chu an chhui zui tih sawiin MSU chuan, "An awmna post ngeiah MSU chuan kal chilhin, Mizo ṭawng an thiam leh thiam loh finfiahna a nei a, Mizo ṭawnga biak theih miah lote'n pawl 8 level Mizo ṭawng test an pass vek mai hi thil dik lo awm ngeiin kan hria," an ti a, hriatthiam har an tih thu an sawi.

MSU hruaitute chuan April 18, 2022 khan SCERT director Laldawngliani Chawngthu hmuin, MRB-a thawk hnam dangte tana LPT chu buatsaih ṭha leh tur leh a ṭul anga hma la turin an ngen a; SCERT Director chuan a rang lama hma an lak tur thu a lo hrilh niin MSU chuan an tarlang.