Lushai Hills Hotel-a thia chhar nula chhungte'n a thlenpui mipa an ringhlel

Vanlalhmangaihzuali Fanai (30) d/o F Lalrintluanga, Lunglei Electric Veng chu April 19, Thawhlehni chawhnu khan a thlenna Lushai Hills Residency Hotel, Zarkawtah thia chhar a ni a, a thlenpui T Zodinsanga chu a chhungte'n an ringhlel a, Aizawl Police Station-ah FIR an thehlut.

Thu dawn danin, Vanlal­hmangaihzuali Fanai leh a ṭhianpa T Zodinsanga (38) s/o Ropianga, Lunglei Electric Veng chu April 13, 2022 khan Lushai Hills Residency Hotel-ah an thleng a, a ṭhianpa chuan April 14 zinga a thawhin a hmuh zo lo a, April 15-ah Aizawl PS-ah a hriattir a ni.

Vanlalhmangaihzuali chu ni ruk chhung zawn a nih hnuah April 19, Thawhlehni chawhnu khan a thlenna Lushai Hills Residency Hotel chhâwng hnuai bera lift basement-ah thia hmuh a ni. A taksa a chhe tawh a, a rim pawh a na tawh niin an sawi.

Vanlalhmangaihzuali Fanai ruang hi Aizawl Police Station-a police-te'n an buaipui nghal a, Forensic team-te'n an enfiah bawk.

A ruang hi nimin khan Civil Hospital, Aizawlah post mortem examination (PME) tih a nih hnuah Lungleiah lâk a ni a, an in thlenpui a nih hnuah vui nghal a ni.

Aizawl PS hotute chuan, T Zodinsanga chu thu zawhfiah atan an la nghal a, an kawl mek tih an sawi.

Lungleia journalist-te hnen aṭanga thu dawn danin, Vanlalhmangaihzuali Fanai leh T Zodinsanga te hi inngaizawng an ni a, Vanlalhmangaihzuali awmna chin hriat a nih loh avangin a chhungte chuan April 16, 2022 (Inrinni) khan Aizawl PS-ah FIR an thehlut. Zodinsanga chuan exam zawhah Lungleiah a hawsan niin an sawi.

Police DIG Lalbiakthanga Khiangte chuan, chhuina hmasaa a lan danin, Vanlal­hma­ngaihzuali chu lift (elevator) kawngkhâr ṭha lo aṭangin lift chhuk chhohna kuaah a tla thla nia a lan thu leh CCTV camera aṭangin hotel a chhuahsan lo nia a lan thu media a hrilh.

Lalbiakthanga Khiangte-in media a hrilh danin, T Zodinsanga’n Vanlalhmangaihzuali a hmuh hnuhnun ber chu April 13 zan a ni a, April 14 zing aṭanga a hmuh loh avangin April 14-ah hian a zawng a, a tûk April 15-ah police a hriattir tih police hnenah a sawi. DIG chuan, hotel CCTV camera-ah April 14 zing hma taka hotel gate-a a láwn lai hmuh tur a awm niin a sawi bawk.

Hetih lai hian, Lushai Hills Hotel-a thawkte chuan CCTV camera-a lang, hotel gate-a lâwn liam tum chu Vanlalhmangaihzuali a ni loa an hriat thu an sawi a, CCTV-a a lanna an hmuh theih chu hotel-a an inziah luh (check-in) lai vel a nih thu Vanglaini palai an hrilh.

Lushai Hills Hotel-a thawkte chuan, an hotel lift chu hlui deuh tawh mah se, hman lai reng a nih thu an sawi rualin, lift chhunga luhna kawngkhâr chu thîra siam, pawh tawlh chi a nih thu an sawi a; T Zodinsanga chu April 15, 2022-ah hotel aṭanga a chhuah (check-out) thu an sawi bawk.