Mizoramah cheng nuai 210 hmanga din Mau sâwngbàwlna pakua a awm
Mizoramah Bamboo Development Agency (BDA) hnuaiah National Bamboo Mission (NBM) aṭanga sum hmuh cheng nuai 210 hmanga din mau sâwngbâwlna (bamboo processing factory) pakua a awm a, mau hmanga thil siam chhuah hna thawh mek niin, hralh chhuah theih thuai beisei a ni.
Commerce & Industries department SPIO-in RTI Act hmanga zawhna a chhàn danin, Sairang, Zuangtui, Thingsulthliah leh Dàrlawngahte bamboo processing factory a awm a, kum 2019 leh 2021-a dinte a ni hlawm.
Factory-ah hian round agarbatti stick siamna unit pakua a awm a, Sairangah unit panga leh Zuangtuiah unit pahnih bakah, bamboo charcoal & vinegar kiln leh bamboo charcoal briquetting machine pakhat ve ve siam nan cheng nuai 25 ṭheuh, a vaiin cheng nuai 175 hmuh a ni a; Thingsulthliah leh Dàrlawngah unit pakhat ve ve din nan cheng nuai 17.50 ve ve, a vaiin cheng nuai 35 hman a ni bawk.
Commerce & Industries SPIO chuan, factory-a mau sâwngbâwl turin mimal mau lei ṭhin a nih thu a tarlang a, "Rawnàl, rawṭhing leh phulruate hman a ni," a ti a; factory-te chu siam zawh an nih hnuah hripui lêng avangin bul ṭan mai theih a nih loh thu tarlangin, "Tunah hian production neih mek a ni a, hralh chhuah mai theih tura beisei a ni," a ti.
Bamboo factory aṭanga round agarbatti stick siamte chu Mysore-a N Ranga Rao & Sons hnena hralh turin inremna siam tumin hmalak mek a nih thu tarlangin SPIO chuan, "Bamboo charcoal, vinegar leh charcoal briquette-te chu local market-a zawrh chhuah tura ruahman a ni," a ti bawk.
Factory enkawl nana thla khata sum hman zat chungchang zawhna chu, "Bamboo processing factory hi mimal/society-ah outsource vek a nih avangin thla khata an sum hman zat hi tun dinhmunah chuan kan hriatpui rih lo," tia chhàn a ni.
Commerce & Industries SPIO chuan, bamboo processing factory-te chu BDA hnuaiah NBM aṭanga sum hmuh nuai 210 hmanga din a nih thu te, factory din hna chu departmental-a thawh vek a nih thu te, sum dinhmun azirin factory din belh tum a nih thute a tarlang bawk.