Kângmei laka himna leh invenna zirho

Lawngtlaia Fire & Emergency Services (FES) leh Information & Public Relations (IPR) department chuan April 19, Thawhlehni khan Lawngtlai Press Club-ah thuthar thehdarhtute tan kângmei laka himna leh invênna chungchang inzirtirna an buatsaih.

Training hi India ram puma April 14-20, 2022 chhunga Fire Service Week hman mek puala buatsaih a ni a, Lawngtlaia IPRO C Lalhruaitluanga’n kaihruaiin, FES station officer K Lalmuanpuia’n kalkhawmte chu kângmei laka invên dan leh kângmei chhuak ṭan tìr ṭhelh dante a zirtir.

Lawngtlai MJA president Lalngheta Ralte chuan, kângmei laka himna tur leh invenna kawnga Lawngtlai district-in hma a sawn theih nan chanchinbu kaltlang leh district MJA ang pawhin FES department thawhpui an inhuam reng thu a sawi.

Training-a tarlan danin, September 9, 1998-ah Lawngtlai Fire Station din a ni a, thawktu mi 10 - station officer pakhat, leading fireman pahnih, fireman pathum, constable pahnih leh driver pahnih an awm a; kâng ṭhelh lirthei tui litre 2,800 dawng (fire truck) pahnih an nei. Lawngtlai Chandmary-ah kâng ṭhelhna tui thunna tur hmun (fire hydrant) pakhat a awm a, hmun dang pahnihah siam belh tura hmalak mek a ni.

Kuminah ram kâng ṭum sarih an ṭhelh tawh a, kângmei chhuak a awmin phone number 03835-232801 leh 6909138408-ah hriattir tur a ni.