Police zahawmna tibawrhbangah LDYCC-in Chief Minister an puh

Lawngtlai District Youth Congress Committee (LDYCC) chuan thuchhuah siamin, chief minister Zoramthanga chu April 18, 2022 a Lawngtlai a tlawh ṭuma Mizoram Police-te zahawmna tibawrhbangah an puh.

LDYCC chuan Zoramthanga hi an party pisa building thar hawnna programme-ah Lawngtlaiah hian a kal nia tarlangin, “Areopagy-ah MNF party, Lawngtlai Division huaihawtin public meeting a nei a ni. Mizoramin UT kan neih tan tirh ata state official programme ni lo, party programme neihna hmuna Mizoram Police-te zahawmna ti bawrhbanga, kalkawngpui dang veka guard of honour inpek tir hmasa ber a ni,” an ti.

Democracy ramah mipuite thlan lal hi an zahawmin an lal em em tih tarlangin LDYCC chuan, “Hetiang taka thuneihna hmangsuala state police-te meuh zahawmna tih bawrhban a ni hi pawi kan ti takzet," an ti a, CM sum enkawl thiam lo, unaute pawisa kawl thiam em em si, ram hnuai zia ang maia state police-te pawh hrual duhtu Mizoramin a neih thu an tarlang.

LDYCC chuan Mizorama Chief Minister awm tawh zawnga autonomous district council-te hamṭhat ve leh hmasawn ve duh lo bertu niin Zoramthanga hi an puh a, “Mara ADC ten theihtawpa development project an siam pawh chuh luih sak a, a fa chuam Kamrula hnena contract petu a ni,” an ti.