SEDP hnuaia hmalakna tur thlirho

SEDP hnuaia Sports, Youth Affairs, ICT and Tourism Development Board chu nimin khan an chairman Robert Romawia Royte, minister of state hoin Secretariat conference hall-ah an ṭhu a, SEDP hnuaia ruahmanna leh hmalakna tur duante an thlirho.

Robert Romawia Royte chuan, SEDP chu replacement programme ni loin, supplementary programme a nih thu sawiin, “Mite tuina tihchak leh tihphuisui hi a tum lian tak a ni,” a ti.

Minister chuan, Board hnuaia SEDP hmalakna tur chhawp chhuah chinte chu mimal leh chhungkua tinzâwn ni lo mah se, an hmalakna turte chuan sport association hrang hrang tichaka puih te, ṭhalaite hmasawnna tur ngaituah te, mipuiin tourism hmalakna hrang hrang an hlâwkpui theih dan kawng zawnpui leh dapsak te, ICT hmanga mipuiin sorkar an dawr awlsam dan siamsakte a huam thu a sawi.

Sorkar department hotute’n an ruahmannate an tarlang a; ruahmannate chu Chief Minister kaihhruai SEDP Board-ah thlen an rêl a ni.