MNF hi Mizo mipui thinlungah a tlana - Lalchhandama Ralte

Minister of state Lalchhandama Ralte, MNF adviser ni bawk chuan, MNF chu hnam movement a nih avangin mipuiah a tlana hle tih sawiin kum 2023-ah an sorkar leh ngei tur thu a sawi.

Lalchhandama Ralte hian nimin khan Darlawn BRC-a MNF zawm tharte lawm luh inkhawmah thu sawiin, “MNF hi hnam movement nena inzawm tlat a nih avangin Mizo mipui thinlungah a tla na ber a, Mizoram hmun tinah MNF zawm thar an awm reng. Chuvangin, kum 2023-a inthlanpui lo awm leh turah pawh MNF kan sorkar leh ngei dawn a ni,” a ti a; MNF chu Pathianin Mizo mipui enkawl turin hriak a thih niin a sawi.

Mipui thleng phâka SEDP kalpui ṭan a ni chu lawmawm a tih thu sawiin Lalchhandama chuan, “SEDP kalpui dan turah kan party mite ka ngen duh che u chu, he programme kan kalpuina turah hian hmeithai leh pachhiate i ngai pawimawh hmasa ang u,” a ti a; an elpui ber party pahnihte chu mipui rilruah an tlahniam zel niin a sawi bawk.

MNF thuchhuah chuan, Lalchhandama Ralte hian Darlawnah hian MNF zawm thar voter 250 a lâwm lut niin a tarlang.