KCC loan puanzar dan tur rêl

Lawngtlai district bawrhsap Dr Andrew H Vanlaldika hoin April 19, Thawhlehni khan a pisaah sorkar laipuiin kut hnathawktute hamṭhatna atana bank kaltlanga sum pûk theih dan a ruahman, Kisan Credit Card (KCC) loan chungchang puanzar dan tur sawiho a ni.

Ṭhutkhawmah hian, April 27, 2022-ah Lawngtlai DC conference hall-ah district level KCC loan campaign hawnna buatsaih an rél.

Andrew H Vanlaldika chuan, sorkarin mipui ham­ṭhatna tur ruahmanna ṭha tak tak a duang tih sawiin, "A chhawrtu turte'n an hriat chian loh avangin chhawr mang loha liam a awm fo. KCC loan hi a pung hniam têa rulh theih tur, kut hnathawktute tana din chhuahpui theih tur ruahmanna ṭha tak a ni," a ti a; district mipuiin ṭangkai taka an chhawr theih nan puanzar lamah ṭan lak a ṭul thu a sawi.

KCC loan hi crop loan (Ministry of Agriculture & Farmers' Welfare hnuai) leh Animal Husbandry, Dairying and Fisheries loan (Ministry of AHDF hnuai) a awm a; kut hnathawktute'n mahni account neihna bank kaltlanga lâk theih niin, a pung eng emaw zat chu sorkarin a rulhsak thei a ni.