Sava thang halral a ni

Serchhip Sub-Hqrs. YMA-in Sakhisih Sanctuary leh Entlang Social Forestry an enkawl meka sava awhna tur thangkam an mante chu nimin khan honorary wildlife warden RL Chhuanawma'n a hal ral.

Sava thang halralna puala inkhawm nimin tlaia Serchhip Sub. Hqrs. YMA pisa tuala neihah RL Chhuanawma chuan, "Hetianga YMA-te hmalakna-a sava thang tihchhiat a ni hi a lawmawm hle. Sava chi hrang hrangte hi a tlangpuiin schedule 4-a awm an ni a, sorkar pawhin a ngai pawimawh a ni. Mi ṭhenkhatten sava rep an zuar ṭhin pawh hi dan bawhchhiatna leh man theih a ni a, kum 3 chhung lung in tan leh Rs. 25,000 chawitir thlenga hrem theih a ni," a ti.

Inkhawm kaihruaitu Serchhip Sub. Hqrs. YMA Environment & Protection Committee chairman Lalrinṭhuama Kawlni chuan YMA-ten Sakhisih Sanctuary leh Entlang Social Forestry an enkawl mek te chu ramsa leh sava bakah nungcha dangten chenna atan an hmang tih sawiin, "Hetianga man leh tihhlum tum an lo awm ṭhin hi pawi kan ti hle," a ti a, Serchhip mipuite chu an hmalaknate hriatpuia ramsa leh nungcha dangte humhalhtu nih tum turin a chah.