KHAWTHLIR

Thisen pe
KM Higher Secondary School NSS chuan nimin khan an sikul hall-ah thisen pek an huaihawt a, Civil Hospital, Aizawl tan thisen unit 46 an pe.

HIV dona sawiho
Samaritan Society of Mizoram leh YRG Care chuan nimin khan Mamita IPR conference hall-ah Orphan and Vulnerable Children (OVC) Coordination Meeting of Stakeholders an nei a, chak zawka HIV do dan tur leh HIV vei naupangte'n enkawlna ṭha an dawn theih dan turte an sawiho. Mamit district-ah hian ART la mek mi 413 an awm a, chu'ng zingah chuan kum 15 hnuai lam mi 11 leh Orphan and Vulnerable Children (kum 18 hnuai lam) mi pasarih an awm a ni.

Health Mela
Serlui bialtu MLA Lalrinsanga Ralte chuan nimin khan Vairengte Community Health Centre-ah Health Mela a hawng. Mela-ah hian doctor-te'n mi 600 chuangte hriselna dinhmun an enfiah. Lalrinsanga Ralte chuan, Mela-a damdawi sem chhuahah indaih lohna a awm chuan indaih lohna chu a tum tur thu a sawi.

NEET exam tum tan
Mizoram quota-a MBBS/BDS/BHMS/BAMS leh BASLP zir tum, National Eligibility-cum-Entrance Test (NEET) hmachawn tumte tan online hmangin website neet.nta.nic.in/ ah May 6, 2022 thleng form thehluh theih a ni. Sorkar thuchhuah tarlan danin, Mizote tan exam fee Rs 900 a ni a, credit/debit card/net banking/UPI/Paytm hmangin pek theih a ni. NEET neih hun tur chu July 17, 2022 (Pathianni) a ni.

Ramhmul sawiho
Mizoram State Medicinal Plants Board Executive Body chu an chairman Dr R Lalthangliana, Health minister kaihhruaiin April 19, Thawhlehni khan an ṭhukhawm a, ramhmul damdawi chungchanga hmalakna leh hmachhawpte an sawiho. Ṭhutkhawmah hian Mizorama ramhmul damdawite a mang loh nan chìn punna tur nursery siam belh te, herbal garden siam te, sikul naupangte tana ramhmul damdawi chungchang zirtirna atan school herbal garden din tura hmalakte an rêl a ni.