Chawlhkar khat hnuah Covid-19 vei mi 100 aia tam hmuh chhuah leh a ni

April 19, Thawhlehni khan Mizoramah Covid-19 vei mi 125 hmuh chhuah a ni a, kumin April 11 hnua mi 100 aia tam hmuh lehna hmasa ber a ni. Nimin khan hripui vei dam tawh mi 89 chhuahtir an ni a, Covid-19 vei mi pakhat a thi.

Thawhlehnia hripui vei hmuh thar mi 125-te chu mipa 47 leh hmeichhia 78 an ni a, RAT hmanga hmuh chhuah vek an ni a, positivity rate chu 16.49% a ni.

RT-PCR, TrueNAT leh FIA hmanga swab sample endikte an negative vek a, April 11, 2022 aṭangin chawlhkar khat chuang RT-PCR hmangin positive hmuh a ni tawh lo.

Kumin April thla bikah hripui vei mi 1,874 hmuh chhuah a ni tawh a; April 11 khan mi 149 hmuh niin, chumi hnuah kar khat chhung chu mi 100 aia tlem hlîr hmuh chhuah a ni a, April 19 khan mi 100 aia tam hmuh chhuah a ni leh chauh a ni.

Covid-19 vei hmuh tamna district-te chu Serchhip leh Saitual district-te an ni a, Serchhip district-a Hmunṭha khuaah mi 53 hmuh chhuah niin, Thawhlehnia hmuh tamna ber khua a ni. Thawhṭanni pawh khan hmuh tamna ber khua a ni tawh bawk.

IDSP record angin, Mizoramah Covid-19 vei 2,26,396 hmuh chhuah a ni tawh a, mipa 1,05,463 leh hmeichhia 1,20,933 an ni a, mipa aiin hmeichhia 15,470-in an tam zawk. Nimin tlai dar 5 thleng khan mi 2,25,207 (99.47%) chhuahtir an ni tawh a, mi 694 (0.31%) thi tawhin, enkawl mek mi 495 (0.22%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,26,396 chu mi 1,000 zelah hripui vei mi 206 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.