Lalduhoma hêknaa thutlukna November 27-ah puang dawn

MNF MLA 12-te'n MLA aṭanga bâng tura ZPM Legislature Party leader Lalduhoma an hêk chungchangah Assembly speaker Lalrinliana Sailo chuan a thutlukna chu November 27, 2020 chawhma dar 11-ah a puang dawn. Speaker chuan, Lalduhoma chungchang chu dan hmanga inbeihna a nih thu a sawi.

Nimina thuthar thehdarhtu ṭhenkhatte nen a pisaa an inkawmnaah Speaker chuan, Lalduhoma chungchang chu uluk taka a ngaihtuah thu a sawi a, "An complaint-na Pu Duhoma kan pe thla a, insawifiahna ni 14 kan pe. A rawn insawifiah hnuah a insawifiahna complaint-tute hnenah pe ve lehin, an duh zawng sawina hun ni sarih kan pe thung," a ti.

Lalrinliana Sailo chuan, Lalduhoma hnenah a complaint-tute thu thehluh an pek leh thu sawiin, "Chumi hnuah November 3, 2020 khan hearing neih a ni. He thil chungchangah hian Parliament leh state-a thil thleng tawh te, Supreme Court thu leh hlate kan ráwn nasa. Ràwn tur ang chi chu kan ráwn kim a ni mai," a ti a; thlei bik an awm tur a ni lo tih chu a ngaihdan a nih thu a sawi.

Assembly Speaker chuan, Lalduh­oma'n complaint a nih chungchang chu Committee on Privileges kutah hlân tura a ngen thu sawiin, "He Committee-ah hian chairman mai bakah member ṭhenkhat chu amah complaint-tute an ni. Chuvangin, lái taka rorel theih a nih ka rin loh avangin ka hlân duh ta lo. Uluk tak leh fimkhur takin ngaihtuahna kan séng a ni," a ti.

Thuthar thehdarhtute zawhna chhángin Lalrinliana Sailo chuan, thutlukna chu dan ang taka siam nia a inhriat thu sawiin, "He thil hi politics thil a ni lo a, dan hmanga inbeihna a ni," a ti a; dan a ngaih pawimawh ber thu a sawi.